Ինչու են հիմա ապամոնտաժվում Աբովյան փողոցի ինքնակամ շինությունները. քաղաքապետարանի մեկնաբանությունը․ ՏԵՍԱՆՅՈՒԹ

«Չորս ինքնակամ շինությունների ապամոնտաժման աշխատանքներ են իրականացվում, որոնք ժամանակին կառուցվել են Երևան համայնքին պատկանող հողամասի վրա», – Factor TV-ի հետ զրույցում հայտնեց Երևանի քաղաքապետարանի հասարակական կարգի պահպանության պետ Ավետիք Բաբայանը՝ անդրադառնալով Աբովյան փողոցում իրականացվող աշխատանքներին։ 

Քաղաքապետարանի պաշտոնյայից հետաքրքրվեցինք, թե ինչու՞ են հենց հիմա քանդման աշխատանքներ իրականացվում և արդյո՞ք նոր են իմացել, որ շինությունները ինքնակամ են։ 

«Քանի որ ինքնակամ շինությունների ծավալը մեծ է, ըստ հերթականության բոլորը ապամոնտաժելով գնում ենք առաջ։ Տնտեսվարողներին առանձնապես չենք ծանուցել, yerevan.am կայքում տեղադրված է, համարում եմ, որ տնտեսվարողն արդեն ծանուցված է»,- ասաց Բաբայանը։ 

Երևանի քաղաքապետի որոշման մեջ նշված է, որ Երևանի Կենտրոն վարչական շրջանի Աբովյան փողոցի 1/3 հասցեում (Աբովյան փողոց և Հյուսիսային պողոտա հատման մասում՝ Աբովյան փողոցի կողմից) գտնվող, Երևան համայնքին պատկանող հողամասում ինքնակամ կառուցվել են շինություններ, որով ծանրաբեռնվել է համայնքային սեփականություն հանդիսացող հողամասը: 

«Նշված շինությունները կառուցվել են առանց համապատասխան քաղաքաշինական փաստաթղթերի, ուստի հնարավոր չէ վստահ լինել և կարճ ժամանակում պարզել, արդյոք դրանց կառուցման ընթացքում պահպանվել են անհրաժեշտ քաղաքաշինական և անվտանգության նորմերը, ուստի շինությունները կարող են վտանգ ներկայացնել անձանց կյանքին և առողջությանը, այսինքն՝ վարչական ակտն ընդունելու հապաղումը կարող է հանգեցնել հանրության համար որևէ վտանգի առաջացմանը», – գրված է քաղաքապետի համապատասխան որոշման մեջ։

Մանրամասները՝ տեսանյութում։

Անի Թամրազյան