19.02.2026 | 14:45
ՌԴ-ն 2026 թվականին լայնածավալ ազդեցության արշավ կսկսի Հայաստանի դեմ. Էստոնիայի արտաքին հետախուզության ծառայություն
Չի բացառվում՝ այլ անձանց նկատմամբ մեղադրանքներ ու ազատազրկման հետ կապված միջնորդություններ լինեն․ դատախազ․ ՏԵՍԱՆՅՈՒԹ
Հասարակություն
07.07.2025 | 15:47
ՀՀ Գլխավոր դատախազ Աննա Վարդապետյանն ԱԺ արտահերթ նիստում չբացառեց, որ կլինեն այլ անձինք, որոնց նկատմամբ ահաբեկչության նախապատրաստման գործով մեղադրանքներ ու ազատազրկման հետ կապված միջնորդություններ լինեն։
ՔՊ խմբակցության ղեկավար Արթուր Հովհաննիսյանը Աննա Վարդապետյանին հարցրեց, թե ՔԿ-ի հրապարակած ձայնագրությունների խոսակցություններում տարբեր մարդիկ են գնում, գալիս, խոսում, օրինակ, ԱԺ պատգամավոր Իշխան Սաղաթելյանը, իսկ Գառնիկ Դանիելյանն էլ ասում է, որ ինքն է վճարում Վազգեն Գալստանյանի կենցավայրի վարձի փողը։
«Այսինքն՝ մի վայրի վարձի փող, որտեղ ահաբեկչություն է կազմակերպվում, տալիս է պատգամավորը։ Ի՞նչ է անում դատախազությունն այս հանգամանքների բերումով։ Ես ինձ անվտանգ չեմ զգում՝ Ազգային ժողովի դահլիճում տեսնելով մարդկանց, որոնք այս խոսակցության մասնակից են եղել»,- հարցրեց իշխանական խմբակցության քարտուղարը։
Աննա Վարդապետյանն էլ, ի պատասխան, հայտնեց, որ էլի անձինք կան, որոնց վերաբերյալ քննչական, ստուգողական գործողություններ են կատարվում։
«Որոշակի փաստական տվյալներ ունենալուց հետո դատախազությունը կդիմի ԱԺ»,- նշեց Վարդապետյանը։
Գլխավոր դատախազը խնդրեց կանխատեսական դատողություններ չանել, քանի որ ինտենսիվ քննություն է ընթանում։
«Չի բացառվում՝ այլ անձինք լինեն, որոնց վերաբերյալ մեղադրանքներ ու ազատազրկման հետ կապված միջնորդություններ լինեն»,- ասաց գլխավոր դատախազը։
Հիշեցնենք, որ խորհրդարանը քննարկում է Աննա Վարդապետյանի միջնորդությունը «Հայաստան» խմբակցության պատգամավոր Արթուր Սարգսյանի նկատմամբ քրեական հետապնդում հարուցելուն համաձայնություն տալու մասին։
Հիշեցնենք նաև՝ հունիսի 26-ի առավոտյան հայտնի դարձավ, որ զանգվածային խուզարկություններ են սկսվել «Սրբազան պայքար» շարժման աջակիցների տներում, խուզարկություններ են իրականացվում նաև ՀՅԴ անդամների և «Հայաստան» խմբակցության պատգամավոր Արթուր Սարգսյանի տներում։ ՀՀ քննչական կոմիտեն հայտարարեց, որ «Սրբազան պայքար» շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։ Ավելի վաղ տեղեկացրել էինք՝ Հայաստանի Հանրապետության դատախազությունը միջնորդագիր է ուղարկել Ազգային ժողով՝ «Հայաստան» խմբակցության պատգամավոր Արթուր Սարգսյանի նկատմամբ քրեական հետապնդում հարուցելուն համաձայնություն տալու մասին։
Մանրամասները՝ տեսանյութում։
Մանյա Պողոսյան
