Քաղաքականություն
07.07.2025 | 15:43
Անկարայի գլխավոր դատախազը նոր հետաքննություն է սկսել ընդդիմության առաջնորդ Օզգյուր Օզելի դեմ՝ «նախագահին վիրավորելու» և այլ հանցագործությունների համար, որոնք կատարվել են ընդդիմադիր քաղաքապետերի ձերբակալությունից հետո արված արտահայտությունների համար, գրում է Turkish Minute-ը։
Սա գլխավոր ընդդիմադիր Ժողովրդահանրապետական կուսակցության (CHP) ընտրված պաշտոնյաների դեմ ուղղված իրավական հետաքննությունների շարքի վերջին դեպքն էր, որը սկսվել է Ստամբուլի քաղաքապետ Էքրեմ Իմամօղլուի՝ կաշառակերության գործով բանտարկությամբ։
«СHP-ի նախագահ Օզգյուր Օզելի կողմից հուլիսի 5-ին [կուսակցության] գործադիր կոմիտեի նիստից հետո մամուլի ասուլիսում ասված խոսքերը համարվում են հանցագործություններ, որոնք ներառում են նախագահ [Ռեջեփ Թայիփ Էրդողանին] վիրավորելը, հանցագործության կատարմանը բացահայտ խրախուսելը և պետական պաշտոնյաներին վիրավորելն ու սպառնալը»,- ասվում է դատախազի հայտարարության մեջ։
Պարզ չէ, թե նրա որ խոսքերն են հետաքննության հիմք հանդիսացել։ Օզելը կտրականապես դատապարտել էր կուսակցության երեք քաղաքապետի և մեկ փոխքաղաքապետի ձերբակալությունները։
«Բոլորը կզբաղեցնեն իրենց տեղը պատմության մեջ։ Մի կողմում կան նրանք, ովքեր պաշտպանում են քվեատուփը, մյուս կողմում՝ նրանք, ովքեր հանձնվում են [Էրդողանին] և նրա վախերին։ Դուք խլում եք մարդկանց ընտրելու իրավունքը, խլում եք նրանց ընտրած քաղաքապետերին, բանտարկում եք ապագա նախագահին»,- ասել է նա Իմամօղլուի մասին, որն Էրդողանի ամենաուժեղ մրցակիցն է և CHP-ի թեկնածուն 2028 թվականի նախագահական ընտրություններում։
Հավելենք, որ օրերս CHP-ի ևս երեք քաղաքապետ էր ձերբակալվել կոռուպցիոն հետաքննությունների շրջանակում։ Անթալիայի քաղաքապետ Մուհիթթին Բյոչեքը ձերբակալվել էր Անթալիայի գլխավոր դատախազության կողմից վարվող կաշառակերության հետաքննության շրջանակում։ Ստամբուլում կենտրոնացած առանձին հետաքննության շրջանակում ձերբակալվել էին նաև Ադանայի քաղաքապետ Զեյդան Քարալարը և Ադըյամանի քաղաքապետ Աբդուրահման Թութդերեն։
Անցյալ տարվա նոյեմբերին Էրդողանը հայց էր ներկայացրել Օզելի դեմ՝ «նախագահին հրապարակայնորեն վիրավորելու» և «նախագահական պաշտոնի հեղինակության և պատվի դեմ հանցագործություն կատարելու» համար։ Փետրվարին էլ մեկ այլ դատական հայց է ներկայացվել՝ վիճարկելով Օզելի դերը որպես CHP-ի առաջնորդ՝ հետաքննություն պահանջելով 2023 թվականի նոյեմբերին կայացած կուսակցության համագումարում նրան ընտրած կուսակցության կողմից ընտրակաշառքի գնման մեղադրանքների մասով։
Անցյալ ամիս դատախազները մեկ այլ հետաքննություն էին սկսել՝ Ստամբուլի գլխավոր դատախազին ենթադրաբար վիրավորելու և հանրահավաքի ժամանակ «դատական համակարգի դեմ սպառնալիքներ» հնչեցնելու համար։
Տեղական լրատվամիջոցները նաև հայտնել են, որ ջանքեր են գործադրվում Օզելին խորհրդարանական անձեռնմխելիությունից զրկելու համար, որպեսզի հնարավոր լինի նրան կալանավորել, իբր, «պետական պաշտոնյային վիրավորելու» մեկ այլ գործով։
Թարգմանությունը՝ Էմմա Չոբանյանի
