17.02.2026 | 22:12
Հայաստանի մի շարք հասցեներում էլեկտրաէներգիայի անջատումներ կլինեն
Կլիչկոն կոչ է արել Գերմանիայի կանցլերին Ուկրաինային մատակարարել TAURUS հրթիռներ
Քաղաքականություն
06.07.2025 | 14:38
Կիևի քաղաքապետ Վիտալի Կլիչկոն հույս է հայտնել, որ Գերմանիան կշարունակի ռազմական աջակցությունը Ուկրաինային՝ ՌԴ-ի լայնածավալ ռազմական ագրեսիայից պաշտպանվելու հարցում։ Կիրակի՝ հուլիսի 6-ին, Bild am Sonntag թերթում հրապարակված հոդվածում նա կոչ է արել Գերմանիայի կանցլեր Ֆրիդրիխ Մերցին վերջապես Ուկրաինային տրամադրել TAURUS թևավոր հրթիռներ։
«Կանցլեր Ֆրիդրիխ Մերցն ավելի վաղ արդարացիորեն հայտարարել էր, որ Ռուսաստանի չդադարող հարձակումները քաղաքացիական օբյեկտների վրա հանգեցնում են TAURUS հրթիռների մատակարարմանը։ Հուսով ենք, որ Գերմանիայի նոր կառավարությունը կպահի իր խոսքը»,-նշել է Կիևի քաղաքապետը Bild-ի հոդվածում։
Կլիչկոն Ռուսաստանի նախագահ Վլադիմիր Պուտինի կողմից իր երկրի դեմ սկսած ռազմական ագրեսիան անվանել է «մաքուր ահաբեկչություն», որը «ամեն գիշեր ավելի է սրվում»։
«Միայն մեր քաղաքում արդեն իսկ ավերվել է երկու հազար շենք, անընդհատ նոր վիրավորներ ու զոհեր են հայտնվում»,-նշել է նա։
Կլիչկոյի խոսքով՝ Պուտինը լիովին հստակ ցույց է տվել, որ չի ուզում ոչ հրադադար, ոչ խաղաղություն, ոչ էլ պատերազմի ավարտ։
«Պուտինի նպատակները լիովին հստակ են։ Նա ուզում է ամբողջ Ուկրաինան վերցնել իր վերահսկողության տակ՝ անկախ դրա գնից։ Եվ եթե մենք միասին նրան չկանգնեցնենք Ուկրաինայում, նա հետո կշարունակի հարձակումները այլ երկրների վրա»,-վստահ է Կլիչկոն։
Մերցի նախորդը՝ Գերմանիայի կանցլեր Օլաֆ Շոլցը, բազմիցս մերժել էր Կիևին մատակարարել երկար հեռահարության TAURUS հրթիռներ, որոնք ունակ են ոչնչացնել Ռուսաստանի տարածքում գտնվող ռազմական օբյեկտներ՝ սահմանից բավական հեռու։ Մերցն իր հերթին հանդես էր եկել մատակարարման օգտին՝ նշելով, որ դա պետք է համաձայնեցվի եվրոպացի գործընկերների հետ, և ընդգծել էր, որ այդ դեպքում ուկրաինացի զինվորականների պատրաստմանը պետք է մի քանի ամիս։
Ավելի վաղ՝ ընդդիմության առաջնորդ եղած տարիներին, Մերցը կոչ էր արել Շոլցի կառավարությանը Կիևին տրամադրել TAURUS հրթիռներ և քննադատել էր Ուկրաինային գերմանական զինամթերքի մատակարարման դանդաղ և անբավարար մակարդակը։
