15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
«Համբալ» արտահայտության համար՝ 250,000 դրամ փոխհատուցում․ դատարանը մասնակի է բավարարել Գրիգոր Իսկանդարյանի հայցն ընդդեմ Արմեն Ավինյանի
Հասարակություն
05.07.2025 | 14:13
Առաջին ատյանի քաղաքացիական դատարանը, նախագահությամբ դատավոր Գոհար Գրիգորյանի, մասնակի բավարարել է Երևանի ավագանու «Մայր Հայաստան» խմբակցության անդամ Գրիգոր Իսկանդարյանի հայցը։ Այս մասին Factor.am-ը տեղեկանում է «Դատալեքս» դատական տեղեկատվական համակարգից։
Հիշեցնենք՝ ավագանու ընդդիմադիր անդամը դատի էր տվել քաղաքապետ Տիգրան Ավինյանի հորը՝ Արմեն Ավինյանին, «Opel»-ի վարորդներին «համբալ» անվանելու համար։ Իսկանդարյանն Արմեն Ավինյանից պահանջել էր սիմվոլիկ 500 հազար դրամ՝ վիրավորանքի արդյունքում պատճառված ոչ նյութական վնասի փոխհատուցում, ինչպես նաև 15.000 ՀՀ դրամ՝ որպես նախապես վճարված պետական տուրքի փոխհատուցում։
Դատարանը վճռել է Արմեն Ավինյանից հօգուտ Գրիգոր Իսկանդարյանի բռնագանձել 250․000 ՀՀ դրամ՝ պատվին և արժանապատվությանը պատճառված վնասի համար, ինչպես նաև 7.500 դրամ՝ որպես նախապես վճարված պետական տուրքի փոխհատուցում։ Հայցի մնացած մասը մերժվել է։
Հարկ է նշել, որ դատարանի վճիռն ուժի մեջ է մտնում հրապարակման պահից մեկ ամիս հետո և նույն ժամկետում կարող է բողոքարկվել ՀՀ վերաքննիչ քաղաքացիական դատարան:
Հիշեցնենք՝ 2024 թվականի տարեվերջին Արմեն Ավինյանը «կարմիր գծերի» մասին լրագրողի հարցին ի պատասխան՝ «համբալ» էր անվանել «Opel»-ի վարորդներին։
«Պտի 500 հազար սարքեն, որ ամեն համբալ չգա կայնի ստեղ իրա գեղի «Opel»-ով»,- ասել էր Արմեն Ավինյանը և պարծեցել, որ ինքն էլեկտրական մեքենա է վարում և, ըստ այդմ, «կարմիր գծերում» անվճար է կայանում։
Տեսանյութի տարածումից ժամեր անց Տիգրան Ավինյանն ափսոսանք էր հայտնել հոր խոսքերի համար և ներողություն խնդրել՝ վստահեցնելով, թե հայրը «պահի տակ, նյարդի ազդեցությամբ է տգեղ խոսքեր» ասել։
Արփի Հակոբյան
