Կալասի այցը տեղի է ունենում ՌԴ-ի կողմից ՀՀ-ի նկատմամբ աննախադեպ ճնշումների պայմաններում․ Մեհրաբյան․ ՏԵՍԱՆՅՈՒԹ

«ԵՄ արտաքին քաղաքականության ու անվտանգության գծով բարձր հանձնակատար Կայա Կալլասի այցը տեղի է ունենում ՌԴ-ի կողմից ՀՀ-ի նկատմամբ աննախադեպ ճնշումների պայմաններում», – այս մասին ԱԳՆ-ի շենքի դիմաց հրավիրված մամուլի ասուլիսի ժամանակ ասաց «Հանուն հանրապետության» կուսակցության փոխնախագահ Ռուբեն Մեհրաբյանը։

Նրա կարծիքով՝ անիմաստ է ՌԴ-ի ներկայությունը մեր երկրում։ Մեհրաբյանը նշեց, որ հենց այդ պատճառով էլ այսօր հնարավոր չէ ՀՀ-ի ԵՄ-ի անդամակցության առաջընթացի մասին խոսելը։ Ռուբեն Մեհրաբյանի դիտարկմամբ՝ հայաստանյան իշխանությունների «կիսաքայլերն էլ նոր հիբրիդային հարձակման թիրախի են վերածվում։

«Այսօր էլ ՌԴ ԱԳ նախարարը միջամտել է մեր երկրի ներքին գործերին, ինչի կապակցությամբ ՀՀ ԱԳ նախարար Արարատ Միրզոյանը պատասխանել է նրան։ Միրզոյանը հենց այդպես էլ կոչեց, որ Մոսկվան միջամտում է ՀՀ-ի ներքին գործերին։ Ժամանակն է, որպեսզի հայտարարություններից բացի նաև շատ գործնական քայլեր լինեն այդ ուղղությամբ, որ ՌԴ-ն մեկընդմիշտ այստեղից դուրս գա»,- ասաց նա։

Հիշեցնենք, ՌԴ ԱԳ նախարար Սերգեյ Լավրովն այսօր հայտարարել է, որ «Հայաստանում ստեղծված իրավիճակը երկրի ներքին գործն է, սակայն եկեղեցու վրա հարձակումները մտահոգիչ են»։ Կայա Կալասի հետ համատեղ ասուլիսում Արարատ Միրզոյանն արձագանքելով Լավրովի հայտարարությանը՝ նշել է, որ Հայաստանում չկա իշխանությունների պայքար եկեղեցու դեմ, «պարոն Լավրովն ավելի լավ է չխառնվի ՀՀ ներքին գործերին»։

Նշենք, որ Արարատ Միրզոյանը և Կայա Կալասն այսօր ստորագրել են «Հայաստանի Հանրապետության և Եվրոպական միության միջև Եվրոպական միության ճգնաժամային կառավարման գործողություններում Հայաստանի Հանրապետության մասնակցության շրջանակը սահմանելու մասին» համաձայնագիրը:

Մանրամասները՝ տեսանյութում։

Մանյա Պողոսյան