12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Ռուսաստանն ու Ուկրաինան գերիների նոր փոխանակում են իրականացրել
Քաղաքականություն
26.06.2025 | 20:58
Ռուսաստանը և Ուկրաինան անցկացրել են գերիների փոխանակման հերթական փուլը։ Այս մասին հաղորդում են ՏԱՍՍ և Ինտերֆաքս լրատվական գործակալությունները՝ հղում անելով ռուսական բանակցային խմբի աղբյուրին, փոխանցում է Meduza-ն։
«Ռուսաստանի և Ուկրաինայի միջև գերիների փոխանակման հերթական փուլը տեղի է ունեցել Ստամբուլի համաձայնագրերի շրջանակներում։ Գերիների փոխանակումը հավասար էր։ Աշխատանքները շարունակվում են», – լրագրողներին ասել է աղբյուրը։ Նա չի նշել, թե քանի մարդ է մասնակցել փոխանակմանը։
Ռուսաստանի պաշտպանության նախարարությունը հաստատել է փոխանակումը: Գործակալության տվյալներով՝ ազատ արձակված զինվորները ներկայումս գտնվում են Բելառուսում և շուտով կտեղափոխվեն Ռուսաստան՝ բուժման և վերականգնողական բուժման համար:
Ուկրաինայի նախագահ Վլադիմիր Զելենսկին նույնպես հաղորդել է հունիսի 26-ին տեղի ունեցած գերիների փոխանակման մասին: Նրա խոսքով՝ Ուկրաինա են վերադարձել Զինված ուժերի, Ազգային գվարդիայի և Պետական սահմանապահ ծառայության զինծառայողներ: Նրանց մեծ մասը գերության մեջ էր 2022 թվականից:
Ստամբուլում ուղիղ բանակցությունների ընթացքում ռուսական և ուկրաինական կողմերը համաձայնության էին եկել փոխանակել 18-ից 25 տարեկան ծանր վիրավորված զինվորների և գերիների, ինչպես նաև միմյանց փոխանցել պատերազմում զոհված զինվորների վեց հազար մարմին։
Մահացածների մարմինների փոխանակումը տեղի է ունեցել մի քանի փուլով՝ հունիսի 11-ից 16-ը։ Ընդհանուր առմամբ, հայրենադարձման գործողությունների շրջանակներում Ուկրաինան ստացել է 6057 մահացածի մարմին (ըստ Ռուսաստանի Դաշնության՝ 6060 մարմին), Ռուսաստանը՝ 78։ Կիևը պնդում է, որ Մոսկվայի կողմից փոխանցված մարմինների թվում եղել են ռուս զինվորների մնացորդներ։
Հիշեցնենք, որ կողմերի միջև գերիների նախորդ փոխանակումը տեղի էր ունեցել հունիսի 20-ին։
Թարգմանությունը՝ Էմմա Չոբանյանի
