Պետությունը գործերը թողած`զբաղվում է ինտրիգներով, երկու հոգու քմահաճույքի համար թատրոն է փակում. Ստեփանյան․ ՏԵՍԱՆՅՈՒԹ

«Այսօր մեր երկրում ցավալի իրողություններ են տեղի ունենում, և բոլորն արժանի են իրար, նույնն են: Թող հանկարծ մեկը չասի, թե ինքն ավելի առաքինի է, ազնիվ, հայրենասեր: Ես չեմ հավատում ո´չ իշխանությանը, ո´չ ընդդիմությանը: Չկա մի ուժ, որը կկարողանա հավաքագրել հասարակությանը, պետությանը»,- Factor TV-ի հետ զրույցում տեսակետ է հայտնում ռեժիսոր, դերասան Սամսոն Ստեփանյանը:

Նա նշում է, որ չի վստահում քաղաքական որևէ ուժի, որևէ կուսակցության, իսկ Ազգային ժողովին նայելիս տպավորություն է ստանում, թե այդտեղ գտնվող մարդիկ քաոս են ստեղծում հասարակության շրջանում. «Որպես քաղաքացի`զզվանքով եմ նայում Ազգային ժողովին: Տպավորություն է, որ կիրթ հասարակություն մեր իշխանավորներին պետք չէ: Ո՞ւր են հասցրել ժողովրդին`մարդիկ միայն ուտելով ու զվարճանալով, հաց և հանդիսությամբ են զբաղված: Կառավարությանն էլ նայում եմ, ուզում եմ ասել`հերի´ք է խաբեք, արժանապատվություն ունեցե´ք, ի՞նչ եք իրար հետևից բամբասում, շուկայի գազազած կանանց նման իրար մազ եք պոկում»:

Ինչ վերաբերում է թատրոնին, Սամսոն Ստեփանյանը շեշտում է` մեր իշխանություններին այն բացարձակ չի հետաքրքրում. «Նրանք հեռու են դրանից, որպես զվարճանք են նայում թատրոնին: Մինչ օրս չկա «Թատրոնի մասին» օրենք, թատրոնի մարդը նայվում է որպես շենքը սպասարկող անձնակազմի անդամ»:

Տարիներ առաջ փակվեց Կամերային երաժշտական թատրոնը, որի գեղարվեստական ղեկավարը հենց Սամսոն Ստեփանյանն էր: Հետո նա ներկայացումներով հանդես էր գալիս «Գոյ» թատրոնում, որն էլ, փաստորեն, միավորում են Սունդուկյանին. «Մի հասարակություն, որը թույլ է տալիս, որ թատրոն փակեն, արժանի չէ թատրոն ունենալու: Պետությունն էլ իր գործերը թողած`զբաղվում է մանր ինտրիգներով, երկու հոգու քմահաճույքի համար թատրոն է փակում»,- ասում է ռեժիսորը:

Մանրամասները`տեսանյութում:

Աննա Բաբաջանյան