Իրանը հերթական հրթիռային համազարկն է տվել Իսրայելին

Իրանի զինված ուժերը սկսել են նոր հրթիռային հարվածներ հասցնել Իսրայելի տարածքում գտնվող թիրախներին ։ Այս մասին հայտնում է իրանական Tasnim գործակալությունը։

Իր հերթին Mehr գործակալությունը տեղեկացրել է, որ Իսլամական հեղափոխության պահապանների կորպուսի օդատիեզերական ուժերը  համակցված հարված են հասցնում հրեական պետության տարածքին՝ տասնյակ հրթիռների և անօդաչու թռչող սարքերի կիրառմամբ:

Իսրայելի դեմ Իրանի հարվածների նոր ալիքը կշարունակվի մինչև լուսաբաց։ Այս մասին տեղեկացնում է NourNews-ը՝ հղում անելով ԻՀՊԿ-ին։

Իրանի զինված ուժերը Իսրայելին հասցված հարվածների ընթացքում կարողացել են ոչնչացնել հեռահար գործողության շառավղով իսրայելական հակաօդային պաշտպանության համակարգը: Այս մասին հայտնում է Fars գործակալությունը՝ հղում անելով իր աղբյուրին։ Նշվում է, որ հարվածը հասցվել է անտեսանելի անօդաչուների օգնությամբ։

Թեհրանում հակաօդային պաշտպանության համակարգերը հետ են մղում Իսրայելի ռազմաօդային ուժերի հերթական հարձակումը, որը սկսվել է Իրանի կողմից հրեական պետության ուղղությամբ հրթիռների արձակումից անմիջապես հետո: Ինչպես հաղորդում է ТАСС-ը, Իսլամական Հանրապետության մայրաքաղաքի երկնքում կրկին պայթյուններ են գրանցվել:

Ավելի վաղ տեղեկացրել էինք, որ Իսրայելի կողմից երկուշաբթի Թեհրանի հյուսիսում գտնվող Իրանի պետական ​​հեռարձակողի վրա հարձակում է իրականացվել՝ քաղաքացիներին մոտակա տարածքները լքելու կոչ անելուց հետո։

Իսրայելը հունիսի 13-ի գիշերը սկսել էր  «Ապստամբող առյուծ» գործողությունը, որն ուղղված է Իրանի միջուկային ծրագրի դեմ: Իրանի Իսլամական Հանրապետությունը պատասխան հարված էր հասցրել։ Երկու կողմերն էլ հայտնել էին այդ հարձակումների հետևանքով զոհվածների և տուժածների մասին։