Իսրայելը հարձակվել է Իրանի վրա՝ միջուկային սպառնալիքը վերացնելու համար․ Նեթանյահու 

Իսրայելը հարվածներ է հասցրել Իրանին՝ Իրանի միջուկային ծրագրի կարևորագույն օբյեկտները ոչնչացնելու համար, և գործողությունը կշարունակվի այնքան ժամանակ, որքան անհրաժեշտ է։ Այս մասին հայտարարել է վարչապետ Բենիամին Նեթանյահուն ազգին ուղղված ուղերձում․ գրում է ՏԱՍՍ-ը։

«Իսրայելը հենց նոր է սկսել «Առյուծի վերելք» գործողությունը՝ նպատակային ռազմական գործողություն՝ վերացնելու Իրանի կողմից Իսրայելի գոյատևման համար ներկայացվող սպառնալիքը։ Այս գործողությունը կշարունակվի այնքան, որքան անհրաժեշտ է», – ասել է նա՝ հավելելով, որ հարվածների հիմնական նպատակը Իրանի միջուկային ծրագիրը խափանելն է։

Նեթանյահուն կարծիք է հայտնել, որ Թեհրանը չի ցանկանում դիվանագիտորեն լուծել իր միջուկային ծրագրի շուրջ վեճը, չի ցանկանում հրաժարվել ուրանի հարստացման իր ծրագրից, և, հետևաբար, Իսրայելը այլընտրանք չուներ, քան դիմել ուղղակի հարվածների։

Նա նաև անդրադարձել է Երկրորդ համաշխարհային պատերազմի պատմությանը, հիշատակել Հոլոքոստը և Աստվածաշունչը՝ բացատրելով Իրանին հարվածելու իր որոշումը։ Նեթանյահուի խոսքով՝ եվրոպացի առաջնորդների անվճռականությունը նացիզմի դեմ պայքարում հանգեցրել է Երկրորդ համաշխարհային պատերազմի բռնկմանը։ «Այսօր Իսրայելը ցույց տվեց, որ սովորել է պատմության դասերը։ Երբ թշնամիները երդվում են ոչնչացնել ձեզ, հավատացեք նրանց։ Երբ թշնամիները զանգվածային ոչնչացման զենք են ստեղծում, կանգնեցրեք նրանց։ Ինչպես մեզ սովորեցնում է Աստվածաշունչը, երբ ինչ-որ մեկը գալիս է ձեզ սպանելու, առաջինը կանգնեք և գործեք։ Ահա թե ինչ արեց Իսրայելն այսօր։ Մենք առյուծների պես ոտքի կանգնեցինք՝ մեզ պաշտպանելու համար», – պնդել է Իսրայելի վարչապետը։

Ավելի վաղ հայտնել էինք, որ Իսրայելի ռազմաօդային ուժերը հարձակվել են Թեհրանի մոտակայքում գտնվող առնվազն վեց ռազմական բազաների վրա։ Սպանվել է Իսլամական հեղափոխության պահապանների կորպուսի հրամանատար Հոսեյն Սալամին

Թարգմանությունը՝ Անահիտ Խաչատրյանի