ԱՄՆ-ը մասնակի տարհանում է Իրաքում իր դեսպանատան անձնակազմին` Իրանի շուրջ լարվածության աճի ֆոնին

ԱՄՆ պաշտոնյաները հայտարարել են, որ Բաղդադում ԱՄՆ դեսպանատան ոչ հիմնական աշխատակիցները և նրանց ընտանիքները տարհանվելու են անվտանգության բարձրացված ռիսկերի պատճառով։ Նրանք չեն նշել տարհանման պատճառը, սակայն վերջին օրերին Իրանի միջուկային ծրագրի շուրջ բանակցությունները գործնականում կանգ են առել, գրում է BBC-ի ռուսական ծառայությունը։

«Մենք մշտապես գնահատում ենք մեր բոլոր դեսպանատներում անհրաժեշտ անձնակազմի մակարդակը։ Մեր վերջին վերլուծության  հիման վրա որոշել ենք կրճատել մեր առաքելության ներկայությունն Իրաքում»,- BBC-ին ասել է ԱՄՆ Պետքարտուղարության ներկայացուցիչը։

Այս քայլը հաջորդում է ԱՄՆ-ի և Իրանի միջև բանակցությունների հինգ փուլին, որոնց ընթացքում ԱՄՆ նախագահ Դոնալդ Թրամփը հույս ուներ գործարք կնքել՝ Թեհրանի կողմից միջուկային զենքի մշակումը կանխելու համար: Չորեքշաբթի Թրամփը հայտարարել է, որ ավելի ու ավելի քիչ է համոզված, որ Իրանը կդադարեցնի ուրանի հարստացումը:

Այս շաբաթվա սկզբին նա նաև 40 րոպեանոց հեռախոսազրույց է ունեցել (պնդում կա, որ այն լարված է եղել) Իսրայելի վարչապետ Բենիամին Նեթանյահուի հետ, որը մշտապես պաշտպանում է Իրանի հարցում ռազմական, այլ ոչ թե դիվանագիտական ​​մոտեցումը։

Չորեքշաբթի ուշ երեկոյան լրագրողների հետ զրույցում Թրամփը հաստատել է Մերձավոր Արևելքից ամերիկյան անձնակազմի մասնակի տարհանման ծրագրերը՝ տարածաշրջանում լարվածության ֆոնին։

«Այո, նրանց դուրս են բերում, քանի որ այն (Մերձավոր Արևելքը) կարող է վտանգավոր վայր լինել»,- Վաշինգտոնում լրագրողներին ասել է Թրամփը։

Նա նաև հայտարարել է, որ թույլ չի տա Իրանին միջուկային զենք ունենալ։

«Նրանք չեն կարող միջուկային զենք ունենալ։ Ամեն ինչ շատ պարզ է, մենք դա թույլ չենք տա»,- նշել է ԱՄՆ նախագահը։

Վաշինգտոնն ու Թեհրանը ապրիլից ի վեր անցկացրել են բանակցությունների հինգ փուլ՝ նոր միջուկային համաձայնագիր կնքելու համար, և նախատեսվում էր, որ նրանք կրկին կհանդիպեն առաջիկա օրերին: Axios-ը հաղորդում է, որ հանդիպումը կարող է տեղի ունենալ Օմանում՝ կիրակի օրը։

Քանի որ միջուկային բանակցությունները գտնվում են կրիտիկական փուլում, պարզ չէ, թե ԱՄՆ հայտարարության մեծ մասը որքանով է ազդանշան և որքանով է իրական մտահոգության արտահայտություն։

Բացի այդ՝ տարբեր լրատվամիջոցների հաղորդմամբ՝ ԱՄՆ-ն  հանձնարարել է Մերձավոր Արևելքում, մասնավորապես Իրանի մոտ գտնվող իր դիվանագիտական ​​առաքելություններին ստեղծել արագ արձագանքման կոմիտեներ։

Իրանի պաշտպանության նախարար Ազիզ Նասիրզադեն չորեքշաբթի հայտարարել էր, որ եթե բանակցությունները ձախողվեն և Վաշինգտոնը հարված հասցնի Իրանին, Թեհրանը կպատասխանի տարածաշրջանում գտնվող ամերիկյան բազաներին հարվածներով։

Reuters-ը հաղորդում է, որ ԱՄՆ պաշտպանության նախարար Փիթ Հեգսեթը նաև հաստատել է Մերձավոր Արևելքի երկրներից, այդ թվում՝ Քուվեյթից և Բահրեյնից ամերիկացի զինվորականների ընտանիքների կամավոր մեկնումը։

Իրանը հայտարարում է, որ իր ուրանի հարստացման ծրագիրը նախատեսված է քաղաքացիական էներգիայի արտադրության համար, և որ ինքը չի փորձում միջուկային զենք ստեղծել։

Նավթի գներն էլ բարձրացել են ավելի քան 4%-ով այն բանից հետո, երբ լուրեր են տարածվել, որ ԱՄՆ անձնակազմը տարհանվում է այն սպասումներով, որ տարածաշրջանում անկայունությունը կարող է հանգեցնել մատակարարման խնդիրների։

Պենտագոնի տվյալներով՝ Իրաքում տեղակայված է շուրջ 2500 ամերիկացի զինվորական։

Թարգմանությունը՝ Էմմա Չոբանյանի