Բոլորը մեր հրթիռների հասանելիության գոտում են․ Իրանի ՊՆ ղեկավարը սպառնում է հարվածել ԱՄՆ բազաներին

Իրանի պաշտպանության նախարար, բրիգադի գեներալ Ազիզ Նասիրզադեն արձագանքել է որոշ երկրների կողմից Թեհրանին ուղղված սպառնալիքներին՝ միջուկային բանակցությունների ձախողման դեպքում, գրում է Mehr գործակալությունը։

«Իրանի ժողովրդի և զինված ուժերի անունից հայտարարում եմ, որ Աստծո կամքով բանակցությունները կհաջողվեն, բայց եթե դրանք չավարտվեն  և մեզ հակամարտություն պարտադրվի, մյուս կողմի կորուստները, անշուշտ, շատ ավելի մեծ կլինեն, քան մերը։ Ցանկացած հակամարտության դեպքում ԱՄՆ-ը պետք է լքի տարածաշրջանը, քանի որ նրանց բոլոր բազաները մեր հասանելիության սահմաններում են, և մենք կհարվածենք բոլորին ընդունող երկրներում՝ անկախ ամեն ինչից»,- ասել է նա։

Նա նաև հավելել է, որ Իրանն անցյալ շաբաթ հաջողությամբ իրականացրել է երկու տոննա մարտագլխիկով հրթիռի փորձարկում՝ դա որակելով Իրանի պաշտպանական կարողությունների զարգացման գործում մեծ առաջընթաց։

«Մենք շատ լավ առաջընթաց ենք գրանցել պաշտպանական հարցերում։ Մեր օպերատիվ ուժերը լիովին հագեցած են։ Մեր վերջին նվաճումը տեղի ունեցավ անցյալ շաբաթ, երբ հաջողությամբ փորձարկեցինք երկու տոննա մարտագլխիկ կրող հրթիռ՝ գերազանց արդյունքներով»,- ասել է Նասիրզադեն՝ հավելելով, որ փորձարկումը տարածաշրջանային լարվածության պայմաններում Իրանի ռազմական պատրաստվածությունն ու պաշտպանական հզորությունը բարձրացնելու ավելի լայն ջանքերի մի մասն է։

Նախօրեին էլ Նասիրզադեն հայտարարել էր, որ Իսրայելից գաղտնի փաստաթղթերի ձեռքբերումը ցույց է տալիս Իրանի «հետախուզական գերազանցությունը» օկուպացիոն ռեժիմի նկատմամբ։ Նա նշել է, որ Իրանի հետախուզական ուժերի կողմից Իսրայելի ռեժիմից զգայուն տեղեկատվություն ստանալու աննախադեպ գործողությունը ևս մեկ անգամ ցույց է տվել Իսլամական Հանրապետության ներթափանցման կարողությունները և հետախուզական գերազանցությունը տարածաշրջանում և դրանից դուրս ստեղծված բարդ անվտանգության միջավայրում։

«Այս փայլուն հաղթանակը ոչ միայն ոչնչացրեց Մոսադի մասին հորինված առասպելը, այլև ոչնչացրեց չարագործ սիոնիստական ​​ռեժիմի անվտանգության կառուցվածքի հավակնոտ ճակատը՝ ևս մեկ ուժեղ հարված հասցնելով նրա դատարկ գերիշխանությանը»,- հավելել է նա՝ նշելով, թե հետախուզական գործողությունը, որի շրջանակում Իսրայելի գաղտնի փաստաթղթերի հսկայական խմբաքանակ է փոխանցվել Իրանին, Դիմադրության ճակատի կողմից Իսրայելին հասցված ջախջախիչ հարվածներից մեկն էր և ազդարարում էր ռեժիմի «վաղաժամ» փլուզումը։

Հիշեցնենք, որ Իրանը և Միացյալ Նահանգները կիրակի՝ հունիսի 15-ին, Օմանի մայրաքաղաք Մասկատում կանցկացնեն անուղղակի միջուկային բանակցությունների հաջորդ փուլը։

Թարգմանությունը՝ Էմմա Չոբանյանի