Քաղաքականություն
11.06.2025 | 22:14
ԱՄՆ պետքարտուղար Մարկո Ռուբիոն աշխարհի տարբեր երկրներում ամերիկյան դեսպանատներին յրահանգել է սկսել ԱՄՆ Միջազգային զարգացման գործակալության (USAID) մնացած բոլոր աշխատակիցներին աշխատանքից ազատելու վերաբերյալ հրահանգի իրականացումը։ Նա նշել է, որ Պետքարտուղարությունը մինչև երկուշաբթի կստանձնի USAID-ի արտաքին օգնության ծրագրերի կառավարումը, գրում է ABC News-ը։
Դաշնային դատավորը ժամանակավորապես արգելափակել էր նախագահ Դոնալդ Թրամփի հրամանագիրը՝ մի քանի դաշնային գործակալություններում, այդ թվում՝ Պետքարտուղարությունում զանգվածային կրճատումներ կատարելու մասին, և հայցվորները պնդում են, որ Ռուբիոյի վերակազմակերպման ծրագիրը, կարծես թե, խախտում է այդ արգելքը։
Թրամփի վարչակազմը պնդում է, որ ծրագիրն արդեն ընթացքի մեջ էր, երբ նախագահը հրամանագիրը հրապարակել էր, ուստի հնարավոր խախտում չկա։ ԱՄՆ շրջանային դատավոր Սյուզան Իլսթոնը դեռևս որոշում չի կայացրել։
Պետքարտուղարության խոսնակ Թեմի Բրյուսը հայտարարել է, որ Ռուբիոյի հրահանգն «անակնկալ չէր»։
«Դա նոր բան չէր։ Դա այն էր, ինչ մենք կանխատեսել էինք այս տարվա փետրվար և մարտ ամիսներին»,- ասել է նա։
Ռուբիոն դեսպանատներին հանձնարարել է հետևել դեպարտամենտի ծրագրին՝ մինչև սեպտեմբերի 30-ը «վերացնել USAID-ի բոլոր արտասահմանյան գրասենյակները»։
USAID-ի մնացած բոլոր արտասահմանյան աշխատակիցների հեռացումը Թրամփի վարչակազմի և Իլոն Մասկի ղեկավարած Կառավարության արդյունավետության դեպարտամենտի (DOGE) վերջին քայլերից է՝ ոչնչացնելու ԱՄՆ օգնության գործակալությունը և ազատելու դրա ավելի քան 10,000 աշխատակցի և կապալառուների։ Նրանք USAID-ը դարձրել էին վերացման իրենց առաջին թիրախներից մեկը։
Թարգմանությունը՝ Էմմա Չոբանյանի
