17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Պատմության ամենամեծ գործարքը․ Էրդողանը հայտնել է, որ Ինդոնեզիան թուրքական Kaan 48 կործանիչի գնման 10 միլիարդ դոլարի պայմանագիր է կնքել
Քաղաքականություն
11.06.2025 | 22:55
Ինդոնեզիան Թուրքիայից կգնի 48 հատ Kaan հինգերորդ սերնդի կործանիչ՝ ավելի քան 10 միլիարդ դոլար արժողությամբ գործարքով: Այս մասին հայտարարել է Թուրքիայի նախագահ Ռեջեփ Թայիփ Էրդողանը, գրում է Middle East Eye-ը։
Պայմանագիրը ստորագրվել է Ջակարտայում անցկացվող Indo Defence 2025 ցուցահանդեսում, որին մասնակցել են թուրքական պաշտպանական ընկերությունները։ Գործարքի ժամկետը 10 տարի է և ներառում է Kaan ինքնաթիռի որոշ բաղադրիչների համատեղ արտադրություն Ինդոնեզիայում։
Էրդողանը շնորհակալություն է հայտնել իր ինդոնեզացի գործընկեր Պրաբովո Սուբիանտոյին՝ պայմանագիրը որակելով որպես Թուրքիայի պատմության մեջ պաշտպանական արդյունաբերության արտահանման ամենամեծ գործարքը։
Պաշտպանական արդյունաբերության ոլորտի թուրք փորձագետ Յուսուֆ Ակբաբան ասել է, որ գործարքը կարևոր նշանակություն ունի Kaan նախագծի համար՝ նշելով, որ Անկարան դժվարություններ կունենար միայնակ հինգերորդ սերնդի ինքնաթիռի մշակումը ֆինանսավորելու համար։
«Ծախսերը կրճատելու համար անհրաժեշտ է ավելացնել պատվերների քանակը։ Միավորների քանակի աճին զուգընթաց ինքնաթիռի մեկ միավորի գինը նվազում է»,- ասել է Ակբաբան Middle East Eye-ին։
Ակբաբան կարծում է, որ Ինդոնեզիայի մասնակցությունը կարող է հետաքրքրություն առաջացնել իսլամական երկրների և ասիական շուկայի այլ պետությունների կողմից։
«Այդպիսի երկրներ, ինչպիսիք են Կատարը, Ադրբեջանը, Սաուդյան Արաբիան և մի քանի այլ երկրներ, նույնպես դիտարկում են ինքնաթիռի ձեռքբերման հարցը։ Ինդոնեզիայից ստացված այս պատվերից հետո այդ երկրներում գնման գործընթացները նույնպես կարող են արագանալ»,- ասել է նա։
Անցյալ տարի Ադրբեջանը հայտարարել էր նախագծին իր մասնակցության մասին, իսկ հունվարին լուրեր տարածվեցին, որ Սաուդյան Արաբիան հետաքրքրված է գործընկեր դառնալով, չնայած դա դեռևս տեղի չի ունեցել։
Ջակարտային Kaan-ը կօգնի փոխարինել F-16-ների հնացած նավատորմը և լրացնել KF-21 նախագծի Հարավային Կորեայի հետ բաժանման հետևանքով առաջացած բացը։ Մասնագետները նշում են, որ KF-21-ը իսկական հինգերորդ սերնդի ինքնաթիռ չէ, մինչդեռ Kaan-ը ունի վեցերորդ սերնդի որոշ հնարավորություններ, ինչպիսիք են արհեստական բանականության ինտեգրումը և անօդաչու թռչող սարքերի հետ փոխգործունակությունը։
Թուրքիան հինգերորդ սերնդի ինքնաթիռ է մշակում 2010 թվականից, սակայն նախագիծն արագացավ այն բանից հետո, երբ 2019 թվականին ԱՄՆ-ն Անկարային հեռացրեց F-35 ծրագրից՝ ռուսական արտադրության C-400 հրթիռային համակարգը գնելու պատճառով։
Kaan-ն առաջին թռիչքը կատարել է 2024 թվականի փետրվարին՝ ժամանակավորապես օգտագործելով General Electric-ի երկու F110-GE-129 շարժիչներ, նույնը, ինչ թուրքական F-16-ներում։ Turkish Aerospace Industries (TAI)-ը, որը ղեկավարում է նախագիծը, աշխատում է ինքնաթիռի համար տեղական արտադրության շարժիչի վրա։ Ընկերությունը նպատակ ունի առաջին ինքնաթիռը Թուրքիայի ռազմաօդային ուժերին մատակարարել մինչև 2028 թվականի վերջը, չնայած որոշ վերլուծաբաններ կանխատեսում են, որ դա կարող է հետաձգվել մինչև 2030 թվականը։
Առաջին 10 Kaan Block-1 կործանիչները նախատեսված է մատակարարել Թուրքիայի ռազմաօդային ուժերին 2030-2033 թվականների միջև ընկած ժամանակահատվածում։
Թարգմանությունը՝ Էմմա Չոբանյանի
