ՌԴ-ն ու Ուկրաինան գերիների ևս մեկ փոխանակում են իրականացրել

Ռուսաստանի Պաշտպանության նախարարությունը հայտնել է, որ Մոսկվայի և Կիևի միջև գերիների փոխանակման շրջանակում Ուկրաինայից վերադարձել է ռուս զինծառայողների երկրորդ խումբը, գրում է Meduza-ն։

«Փոխարենը  փոխանցվել է Ուկրաինայի զինված ուժերի ռազմագերիների մի խումբ։ Ներկայում ռուս զինծառայողները գտնվում են Բելառուսի տարածքում, որտեղ նրանք ստանում են անհրաժեշտ հոգեբանական և բժշկական օգնություն»,- հայտնել է ՌԴ ռազմական գերատեսչությունը՝ չնշելով, թե քանի զինծառայող է մասնակցել փոխանակմանը երկու կողմերից։

Ուկրաինայի նախագահ Վլադիմիր Զելենսկին հայտնել է, որ հունիսի 10-ին տեղի է ունեցել «ռուսական գերությունից վիրավոր զինվորների վերադարձի առաջին փուլը»։

«Մենք շարունակում ենք մեր մարդկանց վերադարձը, որի շուրջ համաձայնություն ձեռք բերվեց Ստամբուլում։ Այսօր մեր ծանր վիրավոր և վիրավոր զինվորների՝ ռուսական գերությունից վերադարձի առաջին փուլն է։ Նրանց բոլորին անհրաժեշտ է անհապաղ բժշկական օգնություն։ Սա կարևոր մարդասիրական ակտ է»,- նշել է Զելենսկին։

Փոխանակման շուրջ Ռուսաստանը և Ուկրաինան համաձայնության էին եկել Ստամբուլում հունիսի 2-ին բանակցություններին։

Հավելենք, որ կողմերի միջև գերիների նախորդ փոխանակումը տեղի էր ունեցել հունիսի 9-ին։

Կողմերը համաձայնել էին փոխանակել 18-ից 25 տարեկան ծանր վիրավոր զինվորների և գերիների, ինչպես նաև մի պատերազմում զոհված վեց հազար զինվորի մարմին։ Զոհված զինվորների մարմինների փոխանակումը պետք է սկսվեր հունիսի 7-8-ին։ Երկու կողմերն էլ միմյանց մեղադրել են նախնական պայմանավորվածությունները խախտելու մեջ։ Արդյունքում, փոխանակումը սկսվել է հունիսի 9-ին։

Ուկրաինայի նախագահ Վլադիմիր Զելենսկին հայտարարել է, որ փոխանակումը կտևի մի քանի օր։

Թարգմանությունը՝ Էմմա Չոբանյանի