Մոսկվայում հայ բլոգեր Արեգ Շչեպիխինին առևանգած անձինք վերադարձել են Չեչնիա․ նրանք հարցաքննվել են որպես վկաներ և ազատ արձակվել

Մոսկվայում հայազգի գործարար, բլոգեր Արեգ Շչեպիխինին Յարոսլավսկի երկաթուղային կայարանում առևանգածները գործով հարցաքննվել են միայն որպես վկաներ։ Այս մասին գրել է «Նովայա գազետա Եվրոպա»-ն՝ հղում անելով ՌԴ քննչական կոմիտեի աղբյուրին, փոխանցում է Meduza-ն։

Ըստ աղբյուրի՝ գործով կոնկրետ կասկածյալներ կամ մեղադրյալներ չկան։ Հարցաքննությունից հետո, ըստ լրատվամիջոցի, առևանգման մասնակիցները վերադարձել են Չեչնիա։

«Ոչ ոք չի ձերբակալել Դելիմխանովի մարդկանց, ովքեր կատարել են նրա հրամանները [Շչեպիխինին առևանգելու]: Եվ նրանք նույնիսկ չեն փորձել թաքնվել: Չեչենական իշխանությունների հետ իրավիճակը համաձայնեցնելուց հետո նրանք ներկայացել են և հարցաքննվել որպես վկաներ: Եվ հետո նրանք հանգիստ հեռացել են»,- ասել է Քննչական կոմիտեի աղբյուրը։

Չեչնիայից Պետդումայի պատգամավոր Ադամ Դելիմխանովի շրջապատում գտնվող լրատվամիջոցի աղբյուրի խոսքով՝ «նրանց քրեական հետապնդման հարցը լուծվել է»։

Ավելի վաղ հաղորդվել էր, որ Արեգ Շչեպիխինի առևանգման փաստով հարուցվել է քրեական գործ։

Baza-ն հայտնել էր, որ վեց մեղադրյալի մեղադրանք է առաջադրվել անձի առևանգման (Քրեական օրենսգրքի 126-րդ հոդված) և պաշտոնեական լիազորությունների չարաշահման (Քրեական օրենսգրքի 286-րդ հոդված) համար, սակայն նրանցից ոչ մեկը չի ձերբակալվել և ազատ է արձակվել չհեռանալու մասին ստորագրությամբ։

Շչեպիխինը, որի դեմ քրեական գործ է հարուցվել ինտերնետում ծայրահեղականության հրապարակային կոչերի (ՌԴ Քրեական օրենսգրքի 280-րդ հոդվածի 2-րդ մաս) և բռնության սպառնալիքով ատելության հրահրման (ՌԴ Քրեական օրենսգրքի 282-րդ հոդվածի 2-րդ մաս) համար, կալանավորված է երկու ամսով։

Չեչնիայի դատախազությունը, ըստ «Նովայա գազետա Եվրոպա»-ի, Հանրապետության ​​մարդու իրավունքների հանձնակատար Մանսուր Սոլտաևի հետ համատեղ հիմք է նախապատրաստում Շչեպիխինի գործը Չեչնիայի Հանրապետության քննչական վարչություն փոխանցելու համար:

Հիշեցնենք, որ հունիսի 3-ի երեկոյան Արեգ Շչեպիխինն առևանգվել էր Մոսկվայի Յարոսլավսկի երկաթուղային կայարանից։ Առևանգման մասնակիցները և Շչեպիխինը ձերբակալվել էին Մոսկվայի ոստիկանության կողմից։ Հունիսի 4-ին հաղորդվել էր, որ  նա  ազատ է արձակվել «Կրեմլի ազդանշանով», սակայն հունիսի 6-ին դատարանը նրան կալանավորել է։

Չեչնիայի ազգային քաղաքականության նախարար Ահմեդ Դուդաևն ավելի վաղ հայտնել էր, որ Չեչնիայի ոստիկանությունը հետաքննություն է անցկացնում գործարար Արեգ Շչեպիխինի հետ կապված։ Դուդաևը պնդել  էր, թե տղամարդը «բացահայտորեն, հրապարակայնորեն և բազմիցս էթնիկ զտումների և նացիզմի կոչ է արել, վիրավորել է կրոնը և Աստծուն, ինչպես նաև արտահայտել է հստակ ծայրահեղական հայացքներ»։ Չեչեն պաշտոնյան հավելել էր՝ Շչեպիխինը «չի առևանգվել, այլ ձերբակալվել է իրավապահ մարմինների աշխատակիցների կողմից, որոնք համագործակցում են Մոսկվայի համապատասխան գերատեսչությունների հետ»։

«ВЧК-ОГПУ» տելեգրամ ալիքը հրապարակել էր ձայնային հաղորդագրություններ, որոնց համաձայն՝ առևանգմանը մասնակցել են Պետդումայի պատգամավոր Ադամ Դելիմխանովի շրջապատի մարդիկ։

Թարգմանությունը՝ Էմմա Չոբանյանի