10.06.2026 | 22:46
Էնքան էինք ծխում, որ կանալիզացիայի և աղբի հոտը խլեցնեինք. Արթուր Օսիպյանը` բանտի պայմանների մասին. ՏԵՍԱՆՅՈՒԹ
Մոսկվայում չեչենների կողմից առևանգված հայազգի տղամարդն ազատ է արձակվել․ ՌԴ ՆԳՆ-ն հայտնում է նրա գործով 6 անձի ձերբակալության մասին
Քաղաքականություն
04.06.2025 | 14:28
Հայազգի գործարար և բլոգեր Արեգ Սամվելի Շչեպիխինը, որը Մոսկվայի երկաթուղային կայարանից առևանգվել էր չեչենների կողմից, ազատ է արձակվել։ Այս մասին հայտնում են ռուսական տելեգրամ ալիքները։
«Յարոսլավսկի կայարանում առևանգված/ձերբակալված Արեգ Շչեպիխինն ազատության մեջ է։ Նրան ազատ են արձակել կեսգիշերին մոտ։ Աղբյուրները հայտնում են, որ Շչեպիխինը ներկայում գտնվում է Մոսկվայի հոսթելներից մեկում»,- գրել է Baza տելեգրամ ալիքը՝ հավելելով, որ Շչեպիխինին առևանգումից հետո ստիպել են «ներողություն խնդրելու» տեսանյութ ձայնագրել և մեղադրել Ուկրաինայի հետ կապեր ունենալու մեջ։
Ըստ Baza-ի՝ տղամարդը չեչեն ուժայինների կողմից պահվել է «Ֆիլատով Լուգ» մետրոյի տարածքի սրճարանում։ Նրան ծեծի են ենթարկել, ստիպել են ներողություն խնդրել չեչենների և մահմեդականների մասին նախկինում հրապարակված վիրավորական տեսանյութի համար։
Շչեպիխինի խոսքով՝ իրեն երկար ժամանակ «հարցաքննել» են, ամբողջ զրույցը տեսագրվել է։ «Հարցաքննության» ժամանակ նրան ասել են, որ կապված է ուկրաինացիների հետ, ինչպես նաև ստիպել են ասել, որ թմրանյութերի ազդեցության տակ է։ Միաժամանակ, ըստ Շչեպիխինի, իր առևանգումից հետո ոստիկանությունը կանգնեցրել է սև Mercedes մակնիշի մեքենան, բայց չխուզարկելով՝ բաց է թողել։
Չեչնիայի ազգային քաղաքականության նախարար Ահմեդ Դուդաևն ավելի վաղ հայտնել էր, որ Չեչնիայի ոստիկանությունը հետաքննություն է անցկացնում գործարար Արեգ Շչեպիխինի հետ կապված։ Ըստ նրա՝ հետաքննությունը տարվում է «հավատացյալների կրոնական զգացմունքները վիրավորելու նպատակով կատարված հրապարակային գործողությունների և մի խումբ մարդկանց արժանապատվությունը նրանց ազգային պատկանելության և կրոնի հիման վրա նվաստացնելուն ուղղված գործողությունների» հիման վրա։ Դուդաևը պնդում է, թե տղամարդը «բացահայտորեն, հրապարակայնորեն և բազմիցս էթնիկ զտումների և նացիզմի կոչ է արել, վիրավորել է կրոնը և Աստծուն, ինչպես նաև արտահայտել է հստակ ծայրահեղական հայացքներ»։
Չեչեն պաշտոնյան հավելել է՝ Շչեպիխինը «չի առևանգվել, այլ ձերբակալվել է իրավապահ մարմինների աշխատակիցների կողմից, որոնք համագործակցում են Մոսկվայի համապատասխան գերատեսչությունների հետ»։
Միաժամանակ, իրավապահները ձերբակալել են Մոսկվայի Յարոսլավսկի կայարանում հասարակական աղմուկ բարձրացրած իրադարձությունների 6 մասնակցի, հայտնել է ՌԴ Ներքին գործերի նախարարությունը տելեգրամում։
«Հունիսի 3-ի երեկոյան մայրաքաղաքի ոստիկանությունը ձերբակալել է Յարոսլավսկի երկաթուղային կայարանում հասարակական արձագանք առաջացրած իրադարձությունների վեց մասնակցի։ Նրանք տարվել են Ռուսաստանի ՆԳՆ Մոսկվա-Յարոսլավսկայա կայարանի քննչական բաժին»,- ասվում է հայտարարության մեջ։
Թարգմանությունը՝ Էմմա Չոբանյանի
