08.08.2026 | 10:54
Գազամատակարարման դադարեցումներ՝ Վանաձոր և Մասիս քաղաքների մի շարք հասցեներում, Կուրթան բնակավայրում
«Սպասենք, տեսնենք»․ Պեսկովը՝ գերիների և զոհվածների մարմինների փոխանակման մասին
Քաղաքականություն
09.06.2025 | 15:36
ՌԴ նախագահի մամուլի քարտուղար Դմիտրի Պեսկովը հրաժարվել է ենթադրություններ անել՝ արդյո՞ք այսօր՝ հունիսի 9-ին Ռուսաստանի և Ուկրաինայի միջև տեղի կունենա ռազմագերիների և զոհվածների մարմինների փոխանակում, փոխանցում է BBC-ի ռուսական ծառայությունը։
«Եկեք սպասենք և կտեսնենք»,- Պեսկովի խոսքերն է մեջբերում ՏԱՍՍ-ը։
Կրեմլի ներկայացուցիչը նաև մեկնաբանել է փոխանակման վերաբերյալ ուկրաինական հայտարարությունները։
«Մենք տեսել և լսել ենք 100 տարբեր արդարացումներ։ Բայց քիչ հավանական է, որ դրանք կարելի է համարել իրականությանը մոտ»,- ասել է նա։
Փոխանակումը, որի շուրջ Ռուսաստանը և Ուկրաինան համաձայնության էին եկել Ստամբուլում հունիսի 2-ին, սպասվում էր շաբաթավերջին։
«Ցավոք, դեռևս չկան Ռուսաստանից 1000+ մարդկանց համար ամբողջական ցուցակներ, որոնց շուրջ մենք համաձայնության էինք եկել Ստամբուլում»,- հայտարարել է Ուկրաինայի նախագահ Վլադիմիր Զելենսկին։
Նա նաև ասել է, թե Ռուսաստանը կրկին դիմում է «մանիպուլյացիաների և կեղտոտ խաղերի» Ուկրաինայի հետ գերիների փոխանակման հարցում։
«Ռուսական կողմը, ինչպես միշտ, իր ոգուն համահունչ, փորձում է այս հարցերում խաղալ ինչ-որ կեղտոտ քաղաքական և տեղեկատվական խաղ։ Կարևոր է, որ արդյունք լինի։ Կարևոր է, որ մարդիկ վերադառնան տուն։ Մենք հավատում ենք, որ կկարողանանք շարունակել փոխանակման ուղին»,- նշել է նա՝ հավելելով, որ Ուկրաինան, իր հերթին, ամեն ինչ անում է դրա համար։
Թարգմանությունը՝ Էմմա Չոբանյանի
