Զելենսկին հայտնել է, որ հանգստյան օրերին գերիների փոխանակում է սպասվում

Ուկրաինայի նախագահ Վլադիմիր Զելենսկին հայտարարել է, որ շաբաթ և կիրակի օրերին տեղի կունենա գերիների նոր փոխանակում, փոխանցում է BBC-ի ռուսական ծառայությունը։

«Այսօր մեր խմբերը խորհրդակցություններ են անցկացրել փոխանակման վերաբերյալ։ Ռուսական կողմը տեղեկատվություն է փոխանցել, որ այս հանգստյան օրերին՝ շաբաթ և կիրակի, կկարողանա փոխանցել  500 մարդու»,- ասել է նա։

Զելենսկիի խոսքով՝ Կիևը դեռևս չի ստացել փոխանակման ցուցակները։ Գերիների փոխանակումից հետո, ըստ նրա, սպասվում է զոհվածների մարմինների փոխանցում։

Ռուսաստանի նախագահի օգնական, ռուս-ուկրաինական բանակցություններում ռուսական պատվիրակության ղեկավար Վլադիմիր Մեդինսկին իր հերթին է հայտարարել, որ Մոսկվան պատրաստ է ռազմագերիների փոխանակում իրականացնել հունիսի 7-9-ին։

«Մենք ենթադրում ենք, որ, հավանաբար, յուրաքանչյուր կողմից կլինի 1200 մարդ, և սա կրկին կլինի ռազմագերիների ամենամեծ փոխանակումը։ Մենք պատրաստ ենք սկսել հունիսի 7-ին, 8-ին, 9-ին։ Մենք մեր կողմից լիովին պատրաստ ենք դրան»,- ասել է Մեդինսկին։

Նա մանրամասնել է, որ փոխանակվող գերիների վերջնական թիվը դեռևս համաձայնեցվում են։

Նախորդ փոխանակման շրջանակում կողմերը գերիների էին փոխանցել «1000-ը 1000-ի դիմաց» բանաձևով։

Ռուսաստանը և Ուկրաինան գերիների փոխանակման և մահացածների մարմիների փոխանցման նոր փուլի վերաբերյալ համաձայնության են եկել Ստամբուլում հունիսի 2-ին կայացած բանակցությունների ժամանակ։

Հավելենք, որ Ստամբուլում կայացած հանդիպումից հետո հրավիրված մամուլի ասուլիսում ՌԴ նախագահի խորհրդական, ռուսական պատվիրակության ղեկավար Վլադիմիր Մեդինսկին հայտարարել էր, որ Ուկրաինայի հետ բանակցությունների ընթացքում Ռուսաստանն առաջարկել է ռազմաճակատի որոշակի հատվածներում երկու-երեք օրով հրադադար հաստատել՝ զոհվածների մարմինները հավաքելու համար։

Ուկրաինայի պատվիրակության ղեկավար, պաշտպանության նախարար Ռուստեմ Ումերովն էլ հայտարարել էր, որ  բանակցություններում Ռուսաստանը և Ուկրաինան համաձայնության են եկել փոխանակել ծանր հիվանդ և ծանր վիրավորված ռազմագերիներին, ինչպես նաև 18-ից 25 տարեկան գերիներին, «6000-ը 6000-ի դիմաց» ձևաչափով զոհերի մարմինները։

Թարգմանությունը՝ Էմմա Չոբանյանի