Քաղաքականություն
05.06.2025 | 17:41
Միացյալ Նահանգները գնահատում է, որ Ուկրաինայի անօդաչու թռչող սարքերի հարձակումը շաբաթավերջին հարվածել է մինչև 20 ռուսական ռազմական ինքնաթիռի՝ ոչնչացնելով դրանցից մոտ 10-ը։ Այս մասին Reuters-ին հայտնել են երկու ամերիկացի պաշտոնյաներ։
Այնուամենայնիվ, ԱՄՆ պաշտոնյաները հարձակումը բնութագրել են որպես չափազանց նշանակալի, նրանից մեկը նշել է, որ այն կարող է ստիպել Մոսկվային շատ ավելի կոշտ դիրքորոշում որդեգրել ԱՄՆ-ի միջնորդությամբ ընթացող բանակցություններում՝ ավելի քան երեք տարի տևած պատերազմը դադարեցնելու համար։
ՌԴ նախագահ Վլադիմիր Պուտինը չորեքշաբթի հեռախոսազրույցի ժամանակ ԱՄՆ նախագահ Դոնալդ Թրամփին ասել է, որ Մոսկվան ստիպված կլինի արձագանքել հարձակմանը: Թրամփը հայտնել է, որ դա «լավ զրույց էր, բայց ոչ այնպիսին, որը կհանգեցնի անհապաղ խաղաղության»։
Ուկրաինան պնդում է, որ «Սարդոստայն» գործողության շրջանակում թիրախավորել է Ռուսաստանի չորս ավիաբազաներ՝ օգտագործելով թիրախներին մոտ գտնվող կոնտեյներներից արձակված 117 անօդաչու թռչող սարքեր։
Երկու ամերիկացի պաշտոնյաներ, որոնք խոսել նե անանունության պայմանով, գնահատել են, որ ուկրաինական հարվածների արդյունքում, ընդհանուր առմամբ, ոչնչացվել է մոտ 10 և խոցվել մինչև 20 ռազմական ինքնաթիռ։ Այս գնահատականը շատ ավելի պակաս է, քան այն, որը Զելենսկին չորեքշաբթի ներկայացրել էր լրագրողներին։ Նա ասել էր, որ խոցված 41 ռուսական ինքնաթիռների կեսը չափազանց վնասված է վերանորոգման համար։
ՌԴ արտաքին գործերի փոխնախարար Սերգեյ Ռյաբկովն իր հերթին հայտարարել է, որ ուկրաինական անօդաչու թռչող սարքերի հարձակման ժամանակ ռուսական ինքնաթիռները վնասվել են, բայց չեն ոչնչացվել։
«Տեխնիկան, ինչպես հայտարարել են նաև Պաշտպանության նախարարության ներկայացուցիչները, չի ոչնչացվել, այլ վնասվել է։ Դրանք կվերականգնվեն»,- ՏԱՍՍ-ին ասել է Ռյաբկովը։
Նա նաև անհիմն է անվանել Ուկրաինայի հայտարարությունները հարձակման արդյունքների մասին։
«Նույնիսկ մոտ նման բան չկա։ Մենք պետք է հետևենք Պաշտպանության նախարարության ալիքներով տարածվող տվյալներին և տեղեկատվությանը», – հավելել է ՌԴ ԱԳ փոխնախարարը։
Հավելենք, որ նախօրեին Ուկրաինայի անվտանգության ծառայությունը (ՈւԱԾ) հրապարակել էր «Սարդոստայն» գործողության տեսանյութը, որի ընթացքում ուկրաինական անօդաչու թռչող սարքերը հարձակվել էին ՌԴ ռազմավարական ավիացիոն բազաների վրա։Ըստ հաղորդագրության ՝ ռուսական ինքնաթիռների ընդհանուր կորուստները կազմել են 41 միավոր։
Թարգմանությունը՝ Էմմա Չոբանյանի
