ՀՀ այցելող զբոսաշրջիկների թիվը նվազել է, ՌԴ-ից ավելի քիչ են սկսել գալ․ Ֆինանսների նախարար․ ՏԵՍԱՆՅՈՒԹ

2024 թվականին համաշխարհային տնտեսությունում և ՀՀ հիմնական գործընկեր երկրներում տնտեսական աճը շարունակել է մնալ դրական տիրույթում: Այս մասին նշեց ֆինանսների նախարար Վահե Հովհաննիսյանը՝ ԱԺ մշտական հանձնաժողովների հունիսի 4-ի համատեղ նիստում քննարկման ներկայացնելով «ՀՀ 2024 թվականի պետական բյուջեի կատարման մասին» տարեկան հաշվետվության հիմնական մակրոտնտեսական ցուցանիշները, բյուջետային եկամուտների ձևավորումը, հարկային և մաքսային քաղաքականությունը, ծախսերն ու պակասուրդը:

Նախարարի տեղեկացմամբ՝ անցած տարի Կառավարության պարտք-ՀՆԱ ցուցանիշը ցածր է գտնվել 50 տոկոս շեմից: 2024 թ. հարկեր-ՀՆԱ հարաբերակցությունը կազմել է 23,6 տոկոս՝ որոշակի նվազում ունենալով նախորդ տարվա նկատմամբ:

Ըստ Հովհաննիսյանի՝ 2024 թվականին գրանցվել է 5,9 տոկոս տնտեսական աճ:
«Հաշվետու տարում ապրանքների արտահանումը ՀՀ-ում աճել է 53,1 տոկոսով, իսկ հայկական ծագման ապրանքների արտահանումը՝ 18,6 տոկոսով: Հայաստան է այցելել 2 մլն 208 հազար զբոսաշրջիկ: Նախորդ տարվա համեմատ՝ այս թիվը նվազել է շուրջ 4,7 տոկոսով կամ 108 հազար մարդով, որը հիմնականում պայմանավորված է ՀՀ այցելած ՌԴ զբոսաշրջիկների թվի նվազմամբ: 2024թ. գործազրկության մակարդակը նախորդ տարվա նկատմամբ աճել է 1,5 տոկոսային կետով՝ կազմելով 13,9 տոկոս: Միջին ամսական անվանական աշխատավարձը նախորդ տարվա նկատմամբ աճել է 6,4 տոկոսով` կազմելով 287 հազար 172 դրամ»,- ներկայացրեց նախարարը։

Մանրամասները՝ տեսանյութում։

Մանյա Պողոսյան