«Կարմիր գծեր»․ դատարանը որոշում է, քաղաքապետարանը՝ բողոքարկում, վարորդները բարձր գին են վճարում. ՏԵՍԱՆՅՈՒԹ

Արդյոք «կարմիր գծերում» կայանման վճարի թանկացումից հետո Երևանի կենտրոնը բեռնաթափվել է, ի՞նչ փաստական տվյալներ կան, որոնք կարող են վկայել այդ մասին՝ այսօր հետաքրքրվեցինք Երևանի քաղաքապետի մամուլի քարտուղար Հայկ Կոստանյանից։

«Թվային պատկերով դժվար է Կենտրոնի բեռնաթափումը ներկայացնել, որովհետև որպես այդպիսին շատ բարդ է այդ մեխանիզմը կիրառել»,- ասաց Կոստանյանը։

«Կարմիր գծերում» կայանման վճարները շեշտակի թանկացան 2024 թվականի հունվարի 1-ից։ Ա գոտում կայանելը տարեկան 12,000 դրամից դարձավ 160,000 դրամ, իսկ Բ գոտում՝ 12,000 դրամից՝ 24,000։ Դեռ շուրջ 2 տարի առաջ, երբ քննարկվում էր նախագիծը, քաղաքապետարանը տարեկան վճարը շեշտակի թանկացնելը փորձում էր հիմնավորել հենց կենտրոնը բեռնաթափելու անհրաժեշտությամբ։ Այսօր Կոստանյանը պնդեց՝ ժամանակին տարեկան վճարն ընտրողների թիվը տասնյակ անգամներով ավելի մեծ էր, քան հիմա:   

Մայիսի 23-ին Վարչական դատարանը երկրորդ անգամ անվավեր է ճանաչել «կարմիր գծերի» համար սահմանված տեղական վճարներին վերաբերող որոշ դրույթներ։ Առաջին անգամ նման վճիռ եղել էր 2024 թվականի դեկտեմբերի 19-ին։ Դատարանն արձանագրել էր՝ քաղաքապետարանը որևէ ձևով չի ապացուցել, որ վճարը շեշտակի թանկացրել է ծառայությունների որակը բարելավելու նպատակով, իսկ փողոցները բեռնաթափելու պատճառաբանությունն իրավաչափ չէ։ Երևանի քաղաքապետարանը բողոքարկել է դատարանի կայացրած երկու որոշումները։ 

«Մայր Հայաստան» խմբակցության ավագանու անդամ Մեսրոպ Մանուկյանի կարծիքով՝ դատարանի որոշումները բողոքարկելով՝ քաղաքային իշխանությունը փորձում է ժամանակ շահել։ 

Մինչ դատարանն անվավեր է ճանաչում «կարմիր գծերի» համար սահմանված դրույքաչափերը, իսկ քաղաքապետարանը շարունակում է բողոքարկել դատարանի որոշումը, վարորդները շարունակում են վճարել բարձր սակագներով։ 

Մանրամասները՝ տեսանյութում։

Անի Թամրազյան