08.09.2026 | 09:49
ՀՀ տարածքում ավտոճանապարհներն անցանելի են
Ադրբեջանի բանակի հրթիռահրետանային զորքերի ստորաբաժանումներում զորավարժություններ են անցկացվել
Քաղաքականություն
03.06.2025 | 14:11
Ադրբեջանի բանակում, ընթացիկ տարվա մարտական պատրաստության պլանին համապատասխան, հրթիռահրետանային զորքերի ստորաբաժանումներում անցկացվել են մարտական կրակոցներով մարտավարական զորավարժություններ։ Ադրբեջանի ՊՆ-ի հաղորդմամբ՝ կատարվել են ստորաբաժանումները մշտական տեղակայման կետերից կենտրոնացման գոտիներ տեղափոխելու, դրանք տեղում տեղակայելու, տեխնիկան մարտական պատրաստության բերելու և կրակային դիրքեր զբաղեցնելու առաջադրանքները։
Զորավարժությունների ընթացքում ստորաբաժանումները կրակ են բացել հաուբիցներից և համազարկային կրակի ռեակտիվ համակարգերից։ Նշվում է, որ վարժանքների ընթացքում ճշգրիտ հրետանային կրակով ոչնչացվել են պայմանական հակառակորդի թիրախները, հաջողությամբ կատարվել են բոլոր առաջադրանքները։
Հաղորդվում է, որ զորավարժությունների հիմնական նպատակն է կատարելագործել հրամանատարական կազմի հմտություններն օպերատիվ որոշումներ կայացնելու հարցում, բարձրացնել գիտելիքների և հմտությունների մակարդակը, գործողությունների պլանավորումը մարտական օպերացիաների ընթացքում, զարգացնել փոխգործակցությունը զորքերի այլ տեսակների հետ, ինչպես նաև ամրապնդել անձնակազմի դաշտային և գործնական հմտությունները։
Հիշեցնենք, որ օրերս էլ Ադրբեջանի բանակում «Սմերչ» համակարգերով մարտավարական զորավարժություններ էին անցկացվել։
Թարգմանությունը՝ Էմմա Չոբանյանի
