Կիևը պաշտպանական օգնության նոր փաթեթներ կստանա, ներդրումներ կլինեն ԱԹՍ-ների արտադրության մեջ․ Զելենսկի

Ուկրաինան իր գործընկերներից պաշտպանական օգնության նոր  փաթեթներ կստանա, նոր ներդրումներ կլինեն նաև ուկրաինական զենքի, մասնավորապես, անօդաչու թռչող սարքերի արտադրության մեջ։ ՌԲԿ Ուկրաինայի հաղորդմամբ՝ այս մասին հայտարարել է Ուկրաինայի նախագահ Վլադիմիր Զելենսկին Վիլնյուսում Բուխարեստի իննյակի գագաթնաժողովից հետո տեղի ունեցած մամուլի ասուլիսի ժամանակ։

Զելենսկին հայտնել է, որ օտարերկրյա առաջնորդների հետ քննարկել է Ուկրաինայի Անվտանգության ծառայության «Սարդոստայն» գործողությունը։ Նա ընդգծել է՝ գործողությունը ցույց է տվել, թե իրականում ինչ տեսք ունի ժամանակակից պատերազմը և ինչու է այդքան կարևոր տեխնոլոգիաների ոլորտում առաջատար մնալը։

«Մեր բոլոր համատեղ ներդրումներն անօդաչու թռչող սարքերի արտադրության մեջ, մեր համատեղ փորձը մարտադաշտում, մեր գործընկերների հետ համատեղ արված ամեն ինչ ուժեղացնում է Եվրոպան։ Այսօր մենք մեր գործընկերների հետ համաձայնության ենք եկել մի քանի համատեղ որոշումների շուրջ, որոնք է՛լ ավելի կամրապնդեն մեր անվտանգությունը։ Շնորհակալություն բոլորին օգնելու պատրաստակամության համար։ Կլինեն նոր պաշտպանական փաթեթներ, նոր ներդրումներ ուկրաինական զենքի, մասնավորապես, անօդաչու թռչող սարքերի արտադրության մեջ,- հայտարարել է Զելենսկին։

Հավելենք, որ հունիսի 1-ին Ուկրաինայի անվտանգության «Սարդոստայն» գործողության շրջանակում FPV անօդաչու թռչող սարքերը գրոհել էին ՌԴ Ռյազանի մարզի «Դյագիլևո», Մուրմանսկի մարզի «Օլենյա», Իրկուտսկի մարզի «Բելայա» և Իվանովոյի մարզի «Իվանովո» ռազմական օդանավակայանները։ Անօդաչու թռչող սարքերն արձակվել են ավիաբազաների մոտ գտնվող մայրուղում կայանված բեռնատարներից։ Ըստ ուկրաինական կողմի՝ անօդաչու թռչող սարքերը վնասել են ՌԴ  ռազմավարական ավիացիոն 41 ինքնաթիռ, այդ թվում՝ А-50, Ту-95 և Ту-22 М3։

Թարգմանությունը՝ Էմմա Չոբանյանի