29.04.2026 | 18:50
Ժոզե Մոուրինյուն արձագանքել է «Ռեալ» վերադառնալու մասին լուրերին
Կիևը հայտնում է, որ «Սարդոստայն» գործողության ընթացքում վնասվել է ՌԴ թևավոր հրթիռային կրիչների մեկ երրորդը՝ 7 մլրդ դոլար ընդհանուր արժեքով
Քաղաքականություն
02.06.2025 | 11:36
Ուկրաինայի անվտանգության ծառայությունը տեղեկացնում է, որ «Սարդոստայն» հատուկ գործողության ընթացքում անօդաչու թռչող սարքերը հարձակվել են այն օդանավակայանների վրա, որտեղ տեղակայված են ռուսական ռազմավարական ռմբակոծիչները, փոխանցում է Meduza-ն։
«7 միլիարդ ԱՄՆ դոլար։ Այսպիսին է թշնամու ռազմավարական ավիացիայի մոտավոր արժեքը, որին այսօր հարված է հասցվել Ուկրաինայի անվտանգության ծառայության «Սարդոստայն» հատուկ գործողության շրջանակում։ Հարված է հասցվել Ռուսաստանի գլխավոր օդանավակայաններում գտնվող ռազմավարական թևավոր հրթիռային կրիչների 34%-ին»,- ասվում է հայտարարության մեջ։
Ուկրաինայի նախագահ Վլադիմիր Զելենսկին իր երեկոյան ուղերձում խոսելով «Սարդոստայն» գործողության մասին՝ մի շարք մանրամասներ էր հայտնել։
Հավելենք, որ հունիսի 1-ին Ուկրաինայի անվտանգության «Սարդոստայն» գործողության շրջանակում FPV անօդաչու թռչող սարքերը գրոհել էին ՌԴ Ռյազանի մարզի «Դյագիլևո», Մուրմանսկի մարզի «Օլենյա», Իրկուտսկի մարզի «Բելայա» և Իվանովոյի մարզի «Իվանովո» ռազմական օդանավակայանները։ Անօդաչու թռչող սարքերն արձակվել են ավիաբազաների մոտ գտնվող մայրուղում կայանված բեռնատարներից։ Ըստ ուկրաինական կողմի՝ անօդաչու թռչող սարքերը ոչնչացրել են ՌԴ ռազմավարական ավիացիոն 41 ինքնաթիռ, այդ թվում՝ А-50, Ту-95 և Ту-22 М3։
Ռուսաստանի Պաշտպանության նախարարությունը խոստովանել է, որ ուկրաինական անօդաչու սարքերը հարձակվել են հինգ շրջանների, այդ թվում՝ Ամուրի մարզի ռազմական օդանավակայանների վրա: ՌԴ ռազմական գերատեսչության տվյալներով՝ Մուրմանսկի և Իրկուտսկի մարզերում «մի քանի ինքնաթիռներ հրդեհվել են», իսկ Իվանովոյի, Ռյազանի և Ամուրի մարզերի ռազմական օդանավակայաններում «բոլոր ահաբեկչական հարձակումները հետ են մղվել»:
Թարգմանությունը՝ Էմմա Չոբանյանի
