17.12.2025 | 20:49
Մանվել Գրիգորյանի սանիկը՝ Շիրակի մարզպե՞տ․ Դավիթ Առուշանյանի պաշտոնանկության մասին տեղեկություններ են շրջանառվում
Լրագրողները հաստատել են Ուկրաինայում 110 հազար ռուս զինվորների մահը
Քաղաքականություն
30.05.2025 | 21:37
BBC-ի ռուսական ծառայության և Mediazona- ի լրագրողները մայիսի վերջի դրությամբ պարզել են Ուկրաինայի դեմ Ռուսաստանի պատերազմում զոհված 110,608 ռուս զինվորների անուններ, գրում է DW-ն։
ՌԴ շրջանների շարքում Տուվան մեծ առավելությամբ «առաջատարն» է բնակչության թվաքանակի հաշվով կորուստների թվով (120 մահ՝ 10,000 տղամարդու հաշվով)։ Նրան հաջորդում են Բուրյաթիան (91 մահ) և Ալթայի Հանրապետությունը (89)։
Տուվայի յուրաքանչյուր չորրորդ մահացած բնակիչը դատապարտյալ է եղել, որը պատերազմի է ուղարկվել ուղղիչ գաղութից։ Այս ցուցանիշը մեկուկես անգամ ավելին է, քան Ռուսաստանի միջին ցուցանիշը։
BBC-ի ռուսական ծառայությունը նշում է, որ Տուվան ավելի քան 10 տարի զբաղեցնում է առաջին տեղը Ռուսաստանի 100,000 բնակչի հաշվով հանցագործությունների քանակով։ Միևնույն ժամանակ, Տուվայում, դատելով հրապարակային վիճակագրությունից, Ռուսաստանի Դաշնության մյուս շրջաններից ավելի հաճախ, մարդիկ դատապարտվում են առողջությանը դիտավորյալ վնաս հասցնելու, սպանության և սպանության փորձի համար։
Տուվայի բնակիչների շրջանում կորուստների ամենամեծ կատեգորիան կազմում են պրոֆեսիոնալ զինվորականները։ Նրանք կազմում են հանրապետությունում բոլոր հաստատված կորուստների մեկ երրորդը՝ 1,5 անգամ ավելի, քան ռուսական միջին ցուցանիշը։ Տուվայում է տեղակայված է 55-րդ մոտոհրաձգային բրիգադը, որն առաջին օրերից մասնակցել է Ուկրաինայի ներխուժմանը և կրել զգալի կորուստներ։
«Տուվան աղքատ, անապահով տարածաշրջան է՝ առանց սոցիալական շարժունակության։ Բացի այդ, հանցագործության մակարդակը բարձր է։ Նման տարածաշրջանում տղամարդիկ, որպես կանոն, ավելի հակված են ռիսկային վարքագծի։ Եվ նրանց պատերազմի մեջ ներգրավելն ավելի հեշտ է՝ կամավոր կամ կամավոր-պարտադիր»,- անանունության պայմանով BBC-ի ռուսական ծառայությանն ասել է ժողովրդագրական հարցերով մասնագիտացած ռուս գիտնականը։
Բուրյաթիայում յուրաքանչյուր հինգերորդ զոհը մոբիլիզացվածներից է։ Սա գրեթե կրկնակի ավելի է, քան Ռուսաստանի միջին ցուցանիշը։ Նշվում է, որ Բուրյաթիան դարձել է Ռուսաստանում խիստ զորահավաքային մոդելի խորհրդանիշերից մեկը։
Ալթայի Հանրապետությունում զորահավաքն իրականացվել է «մեղմ ռեժիմով», տեղական իշխանությունները հույսը դրել են կամավորների վրա։ Այստեղ զոհված կամավորների բաժինը կազմել է կորուստների ընդհանուր թվի 47 տոկոսը, ինչը 1,9 անգամ ավելի է, քան Ռուսաստանի միջին ցուցանիշը։
Համեմատության համար՝ Մոսկվայում յուրաքանչյուր 10,000 տղամարդու հաշվով մահանում է ընդամենը երեք մարդ։ Նրանցից 26 տոկոսը կամավորներ ոն, 15 տոկոսը՝ մոբիլիզացվածներ, իսկ 20 տոկոսը՝ պրոֆեսիոնալ զինվորներ։
Լրագրողները կամավորների թիմի օգնությամբ Ուկրաինայում պատերազմի առաջին օրվանից ի վեր հաշվում են ռուս զինվորների մահվան մասին հաղորդագրությունները՝ լրատվամիջոցներում, կառավարական կայքերում և սոցիալական ցանցերում։
Մայիսի 16-ից ի վեր, երբ վերջին անգամ հրապարակվել է զոհերի թիվը, լրագրողներն ու կամավորները բացահայտել են զոհերի ևս 2000 նոր անուն։
Լրագրողներն ընդգծում են, որ ռուս-ուկրաինական պատերազմում ռուսական բանակի իրական կորուստները, ըստ ամենայնի, ավելի մեծ են, քանի որ ռուս զինվորների մահվան մասին բոլոր հաղորդումները բաց աղբյուրներում չեն հայտնվում։
Թարգմանությունը՝ Էմմա Չոբանյանի
