ՌԴ-ում դատարանը Պուտինին Հիտլերի հետ համեմատող լուսանկարներ հրապարակած կայքերի արգելք է սահմանել

Օմսկի Կիրովի շրջանային դատարանը ՌԴ նախագահ Վլադիմիր Պուտինի լուսանկարներ և մեմեր պարունակող 12 ինտերնետային էջի արգելք է սահմանել, գրում է  Meduza-ն։

Դատական հայց է ներկայացրել Կիրովի վարչական շրջանի դատախազը։ Նրա կարծիքով՝ որոշ պատկերներ պարունակում են նացիստական ​​խորհրդանիշեր, իսկ նկարներն ու գրառումները «վարկաբեկում են Ռուսաստանի Դաշնության նախագահին», վիրավորում նրա պատիվն ու արժանապատվությունը։

Դատարանը, մասնավորապես, արգելափակել է Պուտինի լուսանկարի հղումը, որում նա պատկերված է բեղերով և Ադոլֆ Հիտլերի սանրվածքով։ Նմանատիպ պատկերը՝ «Putler Kaput» գրությամբ, նույնպես արգելվել է։

Արգելվել է նաև տարածել «Стихи.ру» պորտալի հղումը, որտեղ տեղադրված է Պուտինի գլխին ատրճանակի պատկեր՝ «Ինչպես փրկել Ռուսաստանն ամոթից» գրությամբ։

Բացի այդ, արգելվել է Fishki.net պորտալի էջը, որտեղ ներկայացված է Մոսկվայում տեղի ունեցած բողոքի ցույցերի լուսանկարների ընտրանի։ Մեղադրողի պնդումները վերաբերում են այն պատկերին, որտեղ մի տղամարդ ձեռքում պահում է «Պուտինի ագրեսիան Ուկրաինայի դեմ ուղղված է Ռուսաստանի և Եվրոպայի դեմ» գրությամբ պաստառ։

Օմսկի դատախազությունը համարել է, որ այդ լուսանկարները «բացասաբար են անդրադառնում հասարակության և պետության շահերի վրա, խրախուսում են անորոշ թվով մարդկանց՝ կատարել ահաբեկչական գործողություններ և հանցագործություններ, նպաստում են դրանց կատարմանը, ինչը, իր հերթին, կարող է հանգեցնել մարդու և քաղաքացու իրավունքների և ազատությունների, այդ թվում՝ անչափահասների, ինչպես նաև պետության անվտանգության խախտմանը»։

Թարգմանությունը՝ Էմմա Չոբանյանի