Թրամփի բանագնացը հայտարարել է, որ ՌԴ-ի մտահոգությունները ՆԱՏՕ-ի ընդլայնման վերաբերյալ «արդարացի» են

Ռուսաստանի մտահոգությունները դեպի արևելք ՆԱՏՕ-ի ընդլայնման վերաբերյալ «արդարացի են»։ Այս մասին ABC News-ին ասել է ԱՄՆ նախագահի՝ Ուկրաինայի հարցերով հատուկ ներկայացուցիչ Քիթ Քելլոգը, գրում է DW-ի ռուսական ծառայությունը։

«Սա արդարացի մտահոգություն է։ Մենք բազմիցս ասել ենք, որ ՆԱՏՕ-ին Ուկրաինայի անդամակցության հարցը չի դիտարկվում»,- ասել է նա՝ հավելելով, որ այս դիրքորոշումը կիսում են դաշինքի անդամ «առնվազն չորս» այլ երկրներ։

Քելլոգը հավելել է, որ ԱՄՆ-ը և Ուկրաինան դեռևս Ռուսաստանից չեն ստացել հրադադարի առաջարկներով հուշագիրը, սակայն կոչ է արել Կիևին դուրս չգալ պատերազմը դադարեցնելու բանակցություններից։

«Մի՛ ասեք, որ չեք ներկայանա։ Դուք պետք է ցույց տաք, որ լուրջ եք տրամադրված»,- պատմել է նա Ուկրաինայի պաշտպանության նախարար, ուկրաինական կողմից բանակցային պատվիրակության ղեկավար Ռուստեմ Ումերովի հետ զրույցի մասին։

Քելլոգը նաև կրկնել է, որ բանակցությունների հիմնական նպատակը մնում է հրադադարը և «սպանությունների դադարեցումը»։ Բացի այդ, նա հայտարարել է, որ հունիսի 2-ին Ստամբուլում կայանալիք բանակցություններին ներկա կլինեն Գերմանիայի, Ֆրանսիայի և Մեծ Բրիտանիայի անվտանգության  հարցերով խորհրդականները։ Ավելի վաղ հայտնի էր դարձել, որ Ռուսաստանը կրկին Վլադիմիր Մեդինսկիին կուղարկի՝ բանակցությունների հաջորդ փուլին մասնակցելու։

Նշենք, որ Ռուսաստանի նախագահ Վլադիմիր Պուտինի՝ Ուկրաինայի դեմ պատերազմը դադարեցնելու պայմանները «ներառում են պահանջ, որ արևմտյան առաջնորդները գրավոր պարտավորվեն դադարեցնել ՆԱՏՕ-ի արևելյան ընդլայնումը և վերացնենՌուսաստանի դեմ որոշ պատժամիջոցներ»։ Այս մասին հայտնել էր Reuters-ը՝ հղում անելով բանակցություններին ծանոթ երեք բարձրաստիճան ռուսական աղբյուրի։

Հիշեցնենք, որ մայիսի 16-ին Ստամբուլում կայացել էին ռուս-ուկրաինական բանակցությունները, որոնց ընթացքում  ռուսական պատվիրակությունը գլխավորում էր ՌԴ նախագահի օգնական Վլադիմիր Մեդինսկին, իսկ ուկրաինական պատվիրակությունը՝ պաշտպանության նախարար Ռուստեմ Ումերովը: Հանդիպման միակ իրական արդյունքը գերիների փոխանակումն էր՝ «1000-ը 1000-ի դիմաց» բանաձևով, որն ավարտվել է մայիսի 25-ին։

Ավելի վաղ էլ ՌԴ ԱԳ նախարար Սերգեյ Լավրովն Ուկրաինային առաջարկել էր հունիսի 2-ին Ստամբուլում անցկացնել ուղիղ բանակցությունների երկրորդ փուլը։

Կրեմլի մամուլի խոսնակ Դմիտրի Պեսկովն էլ նախօրեին  հայտարարել էր, որ ռուսական կողմը դեռևս չի ստացել Ուկրաինայից պատասխան՝ հունիսի 2-ին Ստամբուլում ուկրաինական կարգավորման շուրջ բանակցությունների ևս մեկ փուլ անցկացնելու առաջարկին։

Թարգմանությունը՝ Էմմա Չոբանյանի