Քաղաքականություն
29.05.2025 | 20:38
Իսրայելի վարչապետ Բենիամին Նեթանյահուն հայտարարել է, որ Իսրայելն ընդունում է ԱՄՆ նախագահի հատուկ բանագնաց Սթիվ Ուիթկոֆի հրադադարի և Գազայում պատանդների ազատ արձակման առաջարկը։ Նեթանյահուն խոսել է ՀԱՄԱՍ-ի կողմից սպանված և դեռևս պատանդառվածների ընտանիքների հետ:
YNet-ը գրում է, որ Իսրայելի բարձրաստիճան պաշտոնյաները հայտարարել են՝ ՀԱՄԱՍ-ը կարող է չհամաձայնվել գործարքին, քանի որ այն չի ներառում պատերազմը դադարեցնելու պարտավորություն։
Նշվում է, որ եթե ՀԱՄԱՍ-ն ընդունի առաջարկը, այն, հավանաբար, կհաստատվի կաբինետի կողմից։
Փաստաթղթի համաձայն՝ ողջ մնացած պատանդներից 10-ը և մահացածների կեսը կվերադարձվեն երկու փուլով՝ մեկ շաբաթ ընդմիջումով։ Մնացած պատանդների ճակատագիրը կախված կլինի հրադադարի բանակցությունների արդյունքից։ Եթե 60 օրվա ընթացքում համաձայնության չհասնեն, Իսրայելը կկարողանա վերսկսել ռազմական գործողությունները։
Պատանդների ընտանիքները խորապես մտահոգված են այն հարցով, թե ովքեր կընդգրկվեն ազատ արձակվողների նախնական ցուցակում։
Իսրայելցի պաշտոնյաները խոստովանում են, որ պատանդների միջև ընտրություն կատարելը «դաժան որոշում» է, որը կարող է «բաժանել ընտանիքները»։ Չնայած Իսրայելը պահանջել է, որ մարդասիրական դեպքերին առաջնահերթություն տրվի, թեպետ պաշտոնյաները խոստովանում են, որ ավելի քան 600 օր ծանր պայմաններում անցկացնելուց հետո «բոլորն արդեն համարվում են մարդասիրական»։
Եթե հրադադարն իրագործվի, ապա ՄԱԿ-ի և միջազգային կազմակերպությունների միջոցով կվերականգնվի Գազային մարդասիրական օգնությունը։
Թարգմանությունը՝ Էմմա Չոբանյանի
