«Զանգեզուրի անցումն» ինտեգրացիոն գիծ է Թուրքիայի միջոցով դեպի թյուրքական աշխարհ․ Էրդողան

Թուրքիայի նախագահ Ռեջեփ Թայիփ Էրդողանը հայտարարել է, թե Անկարան այլևս չի ուզում հակամարտություն տեսնել Հարավային Կովկասում, այլ խաղաղություն և հանգստություն է ուզում տեսնել։

«Տարածաշրջանում մշտական ​​խաղաղությունը բոլորին օգուտ կբերի։ Մենք ուրախ ենք, որ Ադրբեջանի և Հայաստանի միջև խաղաղությունը հորիզոնում է։ Ուշադիր հետևում ենք այդ գործընթացին, նաև անհրաժեշտ ներդրումն ենք կատարում։ Հասանելի խաղաղությունն արժեքավոր կլինի Ադրբեջանի, Հայաստանի և մեր երկրի համար։ Մենք նաև զգուշավոր կարգավորման գործընթաց ենք անցնում Հայաստանի հետ»,- հայտարարել է Էրդողանը։

Նա նաև անդրադարձել է, այսպես կոչված, «Զանգեզուրի միջանցքի» թեմային՝ այս անգամ այն անվանելով «Զանգեզուրի անցում»։

«Զանգեզուրի անցումն Ադրբեջանի համար ոչ միայն Նախիջևանի հետ ցամաքային կապ է, այլև նոր ինտեգրացիոն գիծ, ​​որը Թուրքիայի միջոցով ձգվում է դեպի թյուրքական աշխարհ։ Կարճ ժամանակում այս անցուղու բացումը նաև կամրապնդի Կովկասի տրանսպորտային և էներգետիկ ենթակառուցվածքները: Մենք ակնկալում ենք, որ մեր հարևան Իրանը կաջակցի այդ քայլերին, որոնք կծառայեն մեր տարածաշրջանի խաղաղությանը, հանգստությանը և զարգացմանը։ Անկեղծ ասած, մենք կցանկանայինք, որ նրանք օգտվեին այս «փոխադարձ շահեկան» մթնոլորտից։ Յուրաքանչյուր քայլ, յուրաքանչյուր բացված դուռ և միջանցք կապահովի տնտեսական շահույթ և ժամանակի ընթացքում կմերձեցնի երկրները»,- ասել է Թուրքիայի նախագահը։

Հիշեցնենք, որ Էրդողանը նախօրեին Ադրբեջանի նախագահ Իլհամ Ալիևի հետ մասնակցել էր Բերձորի օդանավակայանի բացմանը։

Թարգմանությունը՝ Էմմա Չոբանյանի