Ալիևը ԱՄՆ սենատորի հետ հանդիպմանը բարձր է գնահատել Թրամփի նամակը

Ադրբեջանի նախագահ Իլհամ Ալիևն ընդունել է ԱՄՆ Սենատի արտաքին հարաբերությունների հանձնաժողովի անդամ, սենատոր Սթիվ Դեյնսին, որը ներկայացնում է Մոնտանա նահանգը։ Ադրբեջանական կողմի հաղորագրության համաձայն՝ Ալիևը բարձր է գնահատել Ադրբեջանի Անկախության օրվա կապակցությամբ ԱՄՆ նախագահ Դոնալդ Թրամփի կողմից ուղարկված շնորհավորական նամակը։

Ալիևը նաև երախտագիտություն է հայտնել Դոնալդ Թրամփի կողմից իր առաջին նախագահության ընթացքում Ադրբեջանի հետ հարաբերությունների զարգացմանը ցուցաբերած ուշադրության համար։

Ուշագրավ է, որ Բաքու այցի ընթացքում ամերիկացի սենատորը հանդիպել է Ադրբեջանում Իսրայելի դեսպան Ջորջ Դիքին։ Հանդիպմանը քննարկվել է իսրայելա-ադրբեջանական հարաբերությունների ներդրումը տարածաշրջանային խաղաղության գործում, ինչպես նաև ընդհանուր նպատակներն ու առաջնահերթությունները, որոնք կապված են ամերիկյան ժողովրդի շահերին համապատասխան լայն տնտեսական և անվտանգության գործընկերության շարունակման հետ։

Ադրբեջանում ԱՄՆ դեսպանատան հաղորդմամբ՝ Սթիվ Դեյնսը հանդիպելու է նաև Ադրբեջանի ԱԳ նախարար Ջեյհուն Բայրամովին և էկոնոմիկայի նախարար Միքայիլ Ջաբբարովին՝ քննարկելու ԱՄՆ-Ադրբեջան տնտեսական ամրապնդումն ու  տարածաշրջանում խաղաղության և անվտանգության առաջ մղումը։

Հիշեցնենք, որ ԱՄՆ նախագահ Դոնալդ Թրամփը Ադրբեջանի Անկախության օրվա կապակցությամբ շնորհավորական նամակում նշել էր, որ Վաշինգտոնը շարունակում է աջակցել Ադրբեջանի և Հայաստանի միջև երկարատև խաղաղությանը, և որ «հիմա ժամանակն է հասնել խաղաղության»։

Թարգմանությունը՝ Էմմա Չոբանյանի