ԱՄՆ դատարանն արգելափակել է այլ երկրների նկատմամբ Թրամփի սահմանած մաքսատուրքերը

ԱՄՆ դաշնային դատարանը նախագահ Դոնալդ Թրամփին արգելել է արտակարգ լիազորությունների մասին օրենքի համաձայն ներմուծման վրա խիստ մաքսատուրքեր սահմանել՝ արագորեն կասկածի տակ դնելով Թրամփի ստորագրած տնտեսական փաթեթը, որը ցնցել է համաշխարհային ֆինանսական շուկաները, հիասթափեցրել առևտրային գործընկերներին և ավելի լայն մտահոգություններ առաջացրել գնաճի աճի ու տնտեսության դանդաղման վերաբերյալ, գրում է AP-ն։

Նյու Յորքում գտնվող ԱՄՆ Միջազգային առևտրի դատարանի՝ երեք դատավորներից բաղկացած կոլեգիայի որոշումը կայացվել է մի քանի դատական ​​​​հայցերից հետո, որոնցում պնդում կա, որ Թրամփի «Ազատագրման օրվա» մաքսատուրքերը գերազանցում են նրա լիազորությունները և երկրի առևտրային քաղաքականությունը կախվածության մեջ են դնում նրա քմահաճույքներից։

Թրամփը բազմիցս հայտարարել է, որ մաքսատուրքերը կստիպեն արտադրողներին վերադարձնել գործարանային աշխատատեղերը Միացյալ Նահանգներ և բավարար եկամուտ կստեղծեն դաշնային բյուջեի դեֆիցիտը կրճատելու համար։ Նա մաքսատուրքերն օգտագործում է որպես բանակցային լծակ՝ հույս ունենալով ստիպել այլ երկրներին բանակցել ԱՄՆ-ին նպաստող համաձայնագրերի շուրջ՝ ենթադրելով, որ ինքը պարզապես մաքսատուրքեր կսահմանի, եթե պայմանները գոհացուցիչ չլինեն։

Սպիտակ տան խոսնակ Քուշ Դեսային ասել է, որ առևտրային դեֆիցիտն ազգային արտակարգ իրավիճակ է, «որն ավերել է ամերիկյան համայնքները, լքել աշխատողներին և թուլացրել երկրի պաշտպանական արդյունաբերական բազան՝ փաստեր, որոնք դատարանը չի վիճարկել»։ Նրա խոսքով՝ վարչակազմը շարունակում է «հանձնառու մնալ՝ գործադիր իշխանության բոլոր լծակներն օգտագործել այս ճգնաժամը լուծելու և Ամերիկայի մեծությունը վերականգնելու համար»։

Թրամփը, հնարավոր է, դեռ կարողանա ժամանակավորապես 15% ներմուծման տուրք սահմանել 150 օրվա ընթացքում այն ​​երկրների համար, որոնց հետ ԱՄՆ-ը զգալի առևտրային դեֆիցիտ ունի։ Որոշման մեջ նշվում է, որ նախագահն այս լիազորությունն ունի 1974 թվականի Առևտրի մասին օրենքի 122-րդ բաժնի համաձայն։

Որոշմամբ ուժի մեջ են թողնվել բոլոր մաքսատուրքերը, որոնք Թրամփը սահմանել էր՝ օգտագործելով 1962 թվականի «Առևտրի ընդլայնման մասին» օրենքի 232-րդ բաժնի լիազորությունները։ Նա 25% տուրք է սահմանել ներմուծվող ավտոմեքենաների և պահեստամասերի մեծ մասի, ինչպես նաև արտասահմանյան արտադրության բոլոր պողպատի և ալյումինի վրա։ Դատարանը որոշում է կայացրել դեմոկրատների կողմից ղեկավարվող նահանգների և մի խումբ գործարարների օգտին, որոնք պնդում էին, որ Թրամփը մաքսատուրքերը սահմանելիս անպատշաճ կերպով կիրառել է 1977 թվականի օրենքը։

Թրամփի վարչակազմն անմիջապես բողոքարկել է որոշումը, գործն այժմ կուղարկվի վերաքննիչ դատարան։

Թարգմանությունը՝ Էմմա Չոբանյանի