13.01.2026 | 10:16
Պետդեպարտամենտում այսօր Մարկո Ռուբիոն կընդունի Արարատ Միրզոյանին
Էջմիածնի միաբանները Նաթան արքեպիսկոպոսի գլխավորությամբ այցելել են Սարդարապատի հուշահամալիր
28.05.2025 | 18:08
Մայիսի 28-ին, Հանրապետության տոնի առիթով Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ, Միածնաէջ Մայր Տաճարում կատարվել է Հանրապետական մաղթանք․ տեղեկացնում են Մայր Աթոռի տեղեկատվական համակարգից։
«Արարողությունը հանդիսապետեց Մայր Աթոռ Սուրբ Էջմիածնի Արտաքին հարաբերությունների և արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը։
Հոգևորականաց դասը և ներկա ժողովուրդն աղոթք բարձրացրեցին առ Աստված Հայաստանի Հանրապետության անսասանության, խաղաղ և բարօր կյանքի համար:
Մաղթանքի ավարտին Նաթան արքեպիսկոպոսն ընթերցեց Հանրապետության տոնի առիթով համայն հայությանն ուղղված Ամենայն Հայոց Կաթողիկոսի ուղերձը։
Նույն օրը Մայր Աթոռ Սուրբ Էջմիածնի միաբանները Գերաշնորհ Տ. Նաթան արքեպիսկոպոս Հովհաննիսյանի գլխավորությամբ այցելեցին Սարդարապատի հուշահամալիր, որտեղ Արմավիրի թեմի առաջնորդ Գերաշնորհ Տ. Սիոն արքեպիսկոպոս Ադամյանի, թեմի եկեղեցականների ուղեկցությամբ հոգևորականները ծաղկեպսակ զետեղեցին հուշակոթողի առջև, ապա աղոթեցին մայիսյան հերոսամարտերում զոհված քաջորդիների հոգիների հանգստության համար»,- ասված է հաղորդագրությունում։
Հիշեցնենք, որ մայիսի 26-ին Ամենայն Հայոց կաթողիկոս Գարեգին Բ-ն մեկնել է Շվեյցարիա՝ մասնակցելու Եկեղեցիների համաշխարհային խորհրդի (ԵՀԽ) և Շվեյցարիայի Բողոքական Եկեղեցու կողմից կազմակերպված «Կրոնական Ազատություն․ հայկական հոգևոր, մշակութային և պատմական ժառանգության պահպանումը Արցախում/Լեռնային Ղարաբաղում» խորագրով միջազգային համաժողովին։
Վերադարձե՞լ է արդյոք Ամենայն հայոց հովվապետը Շվեյցարիայից, հայտնի չէ, սակայն հիշեցնենք, որ նախորդ տարի, երբ ՀՀ վարչապետ Նիկոլ Փաշինյանը Սարդարապատի հուշահամալիրում էր, ոստիկանները պատ էին կազմել՝ փորձելով թույլ չտալ Կաթողիկոսին մոտենալ հուշահամալիրին։
Հիշեցնենք նաև, որ վարչապետ Փաշինյանը նախորդ տարվա այս օրերին խորհրդարանում հայտարարել էր, որ իր դեմ բողոքի ակցիաները ղեկավարում է Գարեգին Բ-ն՝ նախկին նախագահների հետ միասին։
