08.08.2026 | 13:46
Հրազդանում բացվել է Firebird AI ընկերության «ԱԲ գործարանը»
ԱՄՆ-ն Ուկրաինայից ստացել է խաղաղության համաձայնագրի պայմանների ցանկը. ըստ Վաշինգտոնի՝ բանակցությունների նոր փուլը կարող է տեղի ունենալ Ժնևում
Քաղաքականություն
27.05.2025 | 23:12
ԱՄՆ-ն Ուկրաինայից ստացել է մի փաստաթուղթ, որտեղ մանրամասն նկարագրված է ուկրաինական կողմի տեսլականը հրադադարի պայմանների վերաբերյալ։ Այս մասին Fox News-ի եթերում հայտարարել է ԱՄՆ նախագահի հատուկ ներկայացուցիչ Քիթ Քելլոգը, գրում է Meduza-ն։
Նա չի մանրամասնել, թե ինչ կետեր են ներառված ուկրաինական ցուցակում։ Քելլոգի խոսքով՝ Վաշինգտոնն ակնկալում է առաջիկայում նմանատիպ ցուցակ ստանալ Ռուսաստանից։
ԱՄՆ նախագահի հատուկ ներկայացուցիչը նաև հայտարարել է, որ Ռուսաստանի և Ուկրաինայի միջև բանակցությունների նոր փուլը կարող է տեղի ունենալ Ժնևում։ Մինչդեռ, Ռուսաստանի արտաքին գործերի նախարար Սերգեյ Լավրովն ավելի վաղ հայտարարել էր, որ Թուրքիան է Մոսկվայի նախընտրելի տարբերակը։
Ստամբուլում մայիսի 16-ին կայացած բանակցությունների ժամանակ Ռուսաստանը և Ուկրաինան համաձայնության են եկել փոխանակել փաստաթղթեր, որոնք մանրամասն կներկայացնեն հրադադարի պայմանների վերաբերյալ կողմերի տեսլականը։ Ակնկալվում է, որ բանակցությունները կշարունակվեն դրանից հետո։
Լավրովը նշել է, որ Ռուսաստանն ավարտում է ցուցակի ուղղությամբ աշխատանքը և պատրաստ կլինի այն ներկայացնել Ուկրաինային գերիների փոխանակումից անմիջապես հետո։ Փոխանակումն ավարտվել է մայիսի 25-ին։
Բացի այդ, Ռուսաստանը պատրաստում է ևս մեկ փաստաթուղթ՝ «Հուշագիր ապագա խաղաղության պայմանագրի մասին»։ Թե ինչով է այն տարբերվում խաղաղության պայմանների ցանկից, դեռևս պարզ չէ։ Կրեմլը նշում է, որ դրանք երկու տարբեր փաստաթղթեր են։
Թարգմանությունը՝ Էմմա Չոբանյանի
