ԵՄ-ն չի կարողացել համաձայնության գալ ԱՄՆ-ի հետ հակառուսական պատժամիջոցների շրջանցման դեմ համատեղ պայքարի հարցում

Եվրամիությունը չի կարողացել Միացյալ Նահանգների և Չինաստանի հետ պայմանավորվել Ռուսաստանի դեմ պատժամիջոցների պահպանման վերահսկողության վերաբերյալ։ Այս մասին հաղորդում են գերմանական ARD հանրային հեռարձակողը և Süddeutsche Zeitung պարբերականը՝ վկայակոչելով Գերմանիայի արտաքին գործերի նախարարության գաղտնի զեկույցը ԵՄ արտաքին գործերի խորհրդի հանդիպման վերաբերյալ, որը տեղի է ունեցել մայիսի 20-ին Բրյուսելում, գրում է DW-ի ռուսական ծառայությունը։

ԶԼՄ-ների համար փակ հանդիպմանը ԵՄ երկրների ԱԳ նախարարները քննարկել են հետագա պատժամիջոցների հնարավորությունները, ձեռքբերումներն ու թերությունները։ Դրան մասնակցել են ԵՄ պատժամիջոցների հարցերով հատուկ բանագնաց Դեյվիդ Օ՛Սալիվանն ու ԵՄ հետախուզության և իրավիճակների կենտրոնի (EU INTCEN) ղեկավար Դանիել Մարկիչը։ Միաժամանակ, Օ՛Սալիվանը հայտնել է, որ «պատժամիջոցներից խուսափելու հարցերով ամերիկյան կողմի հետ հաղորդակցության բոլոր ուղիներն ընդհատվել են»։

Փաստաթղթում եզրակացություն է արվում, որ ԵՄ-ն այլևս չի կարող հույսը դնել Վաշինգտոնի աջակցության վրա պատժամիջոցներից խուսափելու դեմ պայքարում, և որ G7-ի երկրների համագործակցությունն այս հարցում նույնպես «կորցրել է իր թափը»։ ԵՄ-ն և ԱՄՆ-ն այլևս չեն համագործակցում այս ուղղությամբ, և այժմ պարզ չէ, թե ապագայում ինչպես կհամաձայնեցվեն Ռուսաստանի դեմ հետագա պատժամիջոցները։

Միաժամանակ, Օ՛Սալիվանը և Մարկիչը նշել են, որ պատժամիջոցները զգալի ազդեցություն ունեն Ռուսաստանի տնտեսության վրա։ Այդ տվյալների համաձայն՝ ԵՄ-ն զգալի առաջընթաց է գրանցել երրորդ երկրների, մասնավորապես, Հայաստանի, Սերբիայի, Ուզբեկստանի և Հնդկաստանի միջոցով ռազմական նշանակության ապրանքների արտահանման կանխարգելման գործում։ Դեռևս խնդիրներ կան Ռուսաստանի Դաշնություն արտահանման հոսքերի վերահսկման հարցում Ղազախստանի, ԱՄԷ-ի և Թուրքիայի միջոցով։

Միաժամանակ, «պատժամիջոցների շրջանցման դեպքերի մոտ 80 տոկոսը» բաժին է ընկնում Չինաստանին՝ ներառյալ Հոնկոնգը, սակայն Պեկինի իշխանությունները շարունակում են հերքել դա, ասել է Օ՛Սալիվանը։ Նա նաև նշել է, որ այդ խախտումները վերաբերում են ԵՄ ընկերություններին, ինչը թուլացնում է Եվրահանձնաժողովի դիրքերը երրորդ երկրների հետ բանակցություններում։

Բացի այդ, Բրյուսելում կայացած հանդիպմանը նշվել են որոշակի հաջողություններ ռուսական «ստվերային» նավատորմի դեմ պատժամիջոցների հարցում, որի օգնությամբ ՌԴ-ն նավթ է արտահանում՝ շրջանցելով պատժամիջոցները։ Օ՛Սալիվանն ասել է, որ ԵՄ-ի խնդրանքով մի քանի երկրներ, որոնցում գրանցված են եղել ռուսական լցանավերը, դրանք զրկել են իրենց դրոշներից։ Նա կոչ է արել ԵՄ երկրներին վճռական գործողություններ ձեռնարկել ամբողջ «ստվերային» նավատորմի դեմ և քննարկել Թուրքիայի, Հնդկաստանի և Մալայզիայի նավահանգիստների դեմ միջոցառումների հնարավորությունը, որոնք ամենից հաճախ են ընդունում ռուսական լցանավերը։

Փաստաթղթում նաև նշվում է, որ ԵՄ հաջորդ պատժամիջոցները, ամենայն հավանականությամբ, ուղղված կլինեն Ռուսաստանի էներգետիկ և բանկային ոլորտների դեմ։

«Միայն Հունգարիան է մերժել  այդ առաջարկը՝ ևս մեկ անգամ ցուցադրելով փոխզիջման գնալու պատրաստակամության բացակայությունը»,- ասվում է գերմանական գերատեսչության զեկույցում։

Հիշեցնենք, որ ավելի վաղ ԵՄ խորհուրդը հաստատել էր ՌԴ-ի դեմ պատժամիջոցների 17-րդ փաթեթը։

Թարգմանությունը՝ Էմմա Չոբանյանի