08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
Զելենսկին մայիսի 28-ին Բեռլին կմեկնի՝ Մերցի հետ հանդիպման․ Der Spiegel
Քաղաքականություն
26.05.2025 | 20:36
Ուկրաինայի նախագահ Վլադիմիր Զելենսկին այցով Բեռլին կժամանի չորեքշաբթի՝ մայիսի28-ին։ Այս մասին հայտնել է Der Spiegel-ը, որին վկայակոչում է DW-ի ռուսական ծառայությունը։
Լրագրողների տվյալներով՝ Ուկրաինայի առաջնորդը հանդիպում կունենա Գերմանիայի կանցլեր Ֆրիդրիխ Մերցի հետ։ Հանդիպմանը քննարկվելու են Ռուսաստանի և Ուկրաինայի միջև պատերազմը դադարեցնելու բանակցությունների հնարավոր քայլերը։ Հաղորդվում է, որ Մերցը նաև պատրաստվում է Զելենսկիին տեղեկացնել Ռուսաստանի դեմ ԵՄ նոր պատժամիջոցների փաթեթի ծրագրերի մասին։
«Բացի այդ, հավանաբար, կքննարկվի նաև Ուկրաինային հետագա ռազմական աջակցությունը»,- գրում է լրատվամիջոցը։
Der Spiegel-ի տվյալներով՝ Վլադիմիր Զելենսկին կհանդիպի նաև Գերմանիայի նախագահ Ֆրանկ-Վալտեր Շտայնմայերի հետ։
Հիշեցնենք՝ այսօր ավելի վաղ Գերմանիայի կանցլերը հայտարարել էր, որ Բեռլինը և նրա գործընկերները վերացրել են Կիևին փոխանցվող զենքի հեռահարության սահմանափակումները։
«Ուկրաինային մատակարարվող զենքի հեռահարության սահմանափակումներ այլևս չկան։ Ո՛չ Մեծ Բրիտանիայից, ո՛չ Ֆրանսիայից, ո՛չ էլ մեզանից։ Ամերիկյան կողմից նույնպես նման բան չկա»,- ասել է Մերցը։
Գերմանիայի կանցլերի խոսքով՝ սահմանափակումների վերացումը նշանակում է, որ Ուկրաինան կարող է պաշտպանվել, «օրինակ՝ Ռուսաստանում ռազմական դիրքերին հարձակումներով»։ Նա հավելել է, որ որոշ ժամանակ դա չէր լինում՝ շատ հազվադեպ բացառություններով։
Թարգմանությունը՝ Էմմա Չոբանյանի
