Քաղաքականություն
26.05.2025 | 21:39
Ադրբեջանի նախագահ Իլհամ Ալիևը հրամանագիր է ստորագրել համաներում շնորհելու մասին։ Ադրբեջանական լրատվամիջոցների հաղորդմամբ՝ ներում է շնորհվել 218 մարդու, որոնք պատիժ են կրում ադրբեջանական բանտերում։ Համաներման արժանացածների թվում է Ֆրանսիայի քաղաքացի Թեո Հյուգոն, որը Բաքվի մետրոյի կայարանում մի քանի վագոն էր նկարազարդել։
Ընդհանուր առմամբ, ներում ստացածների թվում են 16 օտարերկրյա քաղաքացիներ։ Նրանցից 5-ը Իրանի քաղաքացի է, 4-ը՝ Ռուսաստանի, 2-ը՝ Պակիստանի, 2-ը՝ Վրաստանի, մեկական՝ Ֆրանսիայի, Թուրքիայի և Աֆղանստանի։
Հավելենք, որ 2024 թվականի սեպտեմբերին Բաքվի Նարիմանովի շրջանային դատարանը վճիռ էր կայացրել երեք օտարերկրացիների գործով, որոնք գրաֆիտի էին արել մետրոյի վագոնների վրա։ Օտարերկրացիներն են՝ Ֆրանսիայի քաղաքացի Թեո Հյուգոն, Նոր Զելանդիայի քաղաքացի Քվենտին դե-Սենտ Իսմայիլն ու Ավստրալիայի քաղաքացի Հան Փոլը։ Ֆրանսիայի քաղաքացին դատապարտվել էր 3 տարվա ազատազրկման, իսկ մյուսները տուգանվել էին 6,800 մանաթով (շուրջ 3,500 եվրո)։
Ավելի ուշ Հյուգոն դիմել էր Ադրբեջանի նախագահ Իլհամ Ալիևին և առաջին փոխնախագահ Մեհրիբան Ալիևային։ Նա նշել էր, որ «հանցագործ չէ, այլ նկարիչ, որը երկու ամիս է՝ բանտում է, և իր ընտանիքը շատ է տուժում այդ վիճակից»։ Նա խնդրել էր իրեն ազատ արձակել։
Ադրբեջանական լրատվամիջոցների հաղորդմամբ՝ համաներմամբ որևէ ադրբեջանցի քաղբանտարկյալ ազատ չի արձակվել։ Մի շարք իրավապաշտպան կազմակերպությունների զեկույցների համաձայն՝ Ադրբեջանում ներկայում կա ավելի քան 360 քաղբանտարկյալ։
Թարգմանությունը՝ Էմմա Չոբանյանի
