08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
ԱԹՍ-ների հարձակումների պատճառով Turkish Airlines-ը չեղարկել է Մոսկվա չվերթները
Քաղաքականություն
26.05.2025 | 17:24
Թուրքական Turkish Airlines ավիաընկերությունը որոշել է ժամանակավորապես չեղարկել դեպի Մոսկվա չվերթները՝ մայիսի լույս 26-ի գիշերը Ռուսաստանի կենտրոնական մասի օդանավակայաններում ուկրաինական անօդաչու թռչող սարքերի հարձակումների հետևանքով սահմանված սահմանափակումների պատճառով, որոնք հանգեցրել են «Դոմոդեդովո», «Վնուկովո» և «Ժուկովսկի» օդանավակայանների չվացուցակում փոփոխությունների։ Այս մասին հայտնել է Ռուսաստանի տուրօպերատորների ասոցիացիան (ATOR), փոխանցում է ՌԻԱ Նովոստին։
«Turkish Airlines-ը կրկին չեղարկում է դեպի Մոսկվա չվերթները։ Կենտրոնական Ռուսաստանի օդանավակայաններում մայիսի 26-ի գիշերը կրկին ինքնաթիռների ժամանման և մեկնման սահմանափակումներ էին մտցվել։ Դա հանգեցրել է «Դոմոդեդովո»-ի, «Վնուկովո»-ի և «Ժուկովսկի»-ի չվացուցակների փոփոխությունների»,- ասվում է հայտարարության մեջ։
Ըստ ասոցիացիայի՝ չեղարկվել են «Վնուկովո»-ից դեպի Ստամբուլ և Անթալիա մի քանի չվերթներ, ինչպես նաև Ստամբուլից և Անթալիայից դեպի «Դոմոդեդովո», AZAL-ի՝ Բաքվից դեպի «Դոմոդեդովո» և Qanot Sharq-ի՝ Տաշքենդից դեպի «Դոմոդեդովո» չվերթները։
Հաղորդվում է, որ տուրօպերատորները ներկայում ուսումնասիրում են իրավիճակը և խորհուրդ են տալիս ժամանակացույցի խափանումից տուժած զբոսաշրջիկներին սպասել նոր մեկնման ժամի վերաբերյալ տեղեկատվության։
«Տեխնիկական պատճառներով որոշ դեպքերում ցուցանակի վրա ուշացման կարգավիճակի փոխարեն Turkish Airlines-ը նշում է չվերթի չեղարկում։ Հենց որ թռիչքը հնարավոր է դառնում, ցուցանակի վրա ժամը և չվերթի համարը փոխվում են, և թռիչքն իրականացվում է։ Մենք ստանում ենք ողջ տեղեկատվությունը և փոփոխություններ ենք կատարում ամրագրումներում՝ դրանց ստացմանը զուգընթաց»,- մեկնաբանել է Pegas Touristik տուրօպերատորի գործադիր տնօրեն Աննա Պոդգորնայան։
Ավելի վաղ հաղորդվել էր, որ Ուկրաինական ԱԹՍ-ները հարվածել են Թաթարստանի, Իվանովոյի և Տուլայի արդյունաբերական ձեռնարկություններին:
Թարգմանությունը՝ Էմմա Չոբանյանի
