Ուկրաինական ԱԹՍ-ները հարվածել են Թաթարստանի, Իվանովոյի և Տուլայի արդյունաբերական ձեռնարկություններին․ ՏԵՍԱՆՅՈՒԹ

Անօդաչու թռչող սարքերը մայիսի լույս 26-ի գիշերը հարվածներ են հասցրել ՌԴ Թաթարստանի, Իվանովոյի և Տուլայի մարզերի արդյունաբերական ձեռնարկություններին, գրում է Meduza-ն։

Ռուսական Mash, Baza, Astra տելեգրամ ալիքների տվյալներով՝ Ելաբուգայում (Թաթարստան) աշխատել են հակաօդային պաշտպանության համակարգերը։ Այստեղ, մասնավորապես, անօդաչու թռչող սարքերի հավաքման գործարաններ կան։

Բացի այդ, ըստ Astra-ի, անօդաչու թռչող սարքերը հարվածել են Իվանովոյի Կինեշմա քաղաքի Դմիտրիևսկիի քիմիական գործարանին։

Տուլայի մարզից նույնպես պայթյունների ձայների և ՀՕՊ աշխատանքների մասին հաղորդագրություններ են ստացվել։ Ալեքսինում, մասամբ նաև Տուլայում, մայիսի 26-ի գիշերը էլեկտրաէներգիայի անջատումներ են եղել, հաղորդում է Mash-ը։ Astra-ն հիշեցնում է, որ մայիսի սկզբին ուկրաինական անօդաչու սարքերը երկու անգամ հարձակվել են Տուլայում տեղակայված «СПЛАВ»-ի վրա, որը մշակում է  համազարկային կրակի ռեակտիվ համակարգեր:

Մայիսի 26-ի առավոտյան Ռուսաստանի ՊՆ-ն նախ հայտարարել էր, որ նախորդ գիշերը ոչնչացվել է 96 ուկրաինական անօդաչու թռչող սարք, այդ թվում՝ մեկ անօդաչու թռչող սարք Թաթարստանի, չորսը՝ Իվանովոյի և հինգը՝ Տուլայի մարզում։ Ավելի ուշ ռազմական գերատեսչությունը հայտնել է, որ ևս յոթ անօդաչու թռչող սարք է խոցվել, որոնցից հինգը՝ Տուլայի մարզի տարածքում։

ԱԹՍ-ների հարձակումների հետևանքների մասին տեղեկություններ դեռևս չեն հաղորդվում։

Բացի այդ, անօդաչուների հարձակումների պատճառով Ռուսաստանի մի շարք շրջաններում օդանավակայանների գործունեությունը կրկին ժամանակավորապես սահմանափակվել է։ «Կոմերսանտը» գրում է, որ Մոսկվայի «Դոմոդեդովո» և «Ժուկովսկի» օդանավակայանները ժամանակավորապես չեն ընդունել և չեն ուղարկել չվերթներ։

Թարգմանությունը՝ Էմմա Չոբանյանի