Սոբյանինը հայտարարել է Մոսկվայի վրա անօդաչու թռչող սարքերով հարձակման մասին

Ռուսաստանի պաշտպանության նախարարության հակաօդային պաշտպանության ուժերը կիրակի օրը՝ մայիսի 25-ին, խոցել են հինգ անօդաչու թռչող սարք, որոնք գալիս էին մայրաքաղաքի ուղղությամբ, հայտնում է Մոսկվայի քաղաքապետ Սերգեյ Սոբյանինը, փոխանցում է DW-ն։

Իշխանությունները չեն հաղորդում տուժածների կամ ավերածությունների մասին՝ ԱԹՍ հարձակման արդյունքում։ Սոբյանինի խոսքով՝ բեկորների ընկնելու վայրում աշխատում են արտակարգ ծառայությունների մասնագետները։ Այլ մանրամասներ չեն ներկայացվում։ ԱԹՍ հարձակումների մասին հաղորդումների ֆոնին՝ մոսկովյան օդանավակայանները՝ Վնուկովոն, Դոմոդեդովոն և Ժուկովսկին, ժամանակավորապես դադարեցրել են թռիչքների և վայրէջքների իրականացումը, հաղորդում է «Ռոսավիացիան»։ Նմանատիպ սահմանափակումներ ներդրվել են նաև Կալուգայի օդանավակայանում։

Մինչ այդ Սոբյանինը հայտնել էր, որ մայիսի 25-ի գիշերը հակաօդային պաշտպանության միջոցները խոցել են 12 անօդաչու թռչող սարք, որոնք ուղղվում էին Մոսկվայի ուղղությամբ։ Նախօրեին երեկոյան ութ տարածաշրջաններում խոցվել էր 95 անօդաչու սարք, ըստ Ռուսաստանի ռազմական գերատեսչության։

Հիշեցնենք՝ ռուսական զորքերը մայիսի 25-ի գիշերը հարվածել են Ուկրաինայի տարածքին՝ կիրառելով հարվածային անօդաչու սարքեր և թևավոր հրթիռներ։ Ուկրաինայի 13 մարզերի նկատմամբ զանգվածային հարձակման արդյունքում զոհվել է 12 մարդ, այդ թվում՝ երեք երեխա, ավելի քան 60 մարդ վիրավորվել է։ Այս հարձակումը համարվում է պատերազմի սկսվելուց ի վեր ամենամասշտաբայիններից մեկը։

ՌԴ ՊՆ-ն հայտարարել է, որ զանգվածային հարձակման նպատակն են եղել ռազմարդյունաբերական համալիրի ձեռնարկությունները։