Թուրքիայի ԱԳ նախարարը կմեկնի Մոսկվա

Թուրքիայի արտգործնախարար Հաքան Ֆիդանը մայիսի 26-27-ը պաշտոնական այցով կմեկնի Ռուսաստան՝ ԱԳ նախարար Սերգեյ Լավրովի հրավերով։ Այս մասին հաղորդում է թուրքական TRT Global-ը։

Այցի ընթացքում Ֆիդանը կհանդիպի Ռուսաստանի նախագահ Վլադիմիր Պուտինի հետ։ Նշվում է, որ Ֆիդանը նախատեսում է բանակցություններ անցկացնել նաև ռուսական բարձրաստիճան այլ պաշտոնյաների հետ, այդ թվում՝ Ռուսաստանի նախագահի տեղակալ Վլադիմիր Մեդինսկիի և պաշտպանության նախարար Անդրեյ Բելոուսովի հետ։ Նշենք, որ Մեդինսկին գլխավորում էր Ռուսաստանի պատվիրակությունը ռուս-ուկրաինական վերջին բանակցություններում։

Բանակցությունների հիմնական թեման կլինի Թուրքիայի դերակատարումը ռուս-ուկրաինական հակամարտության կարգավորման գործընթացում։ Այս համատեքստում Թուրքիան մտադիր է վերահաստատել իր պատրաստակամությունը՝ կազմակերպելու նոր բանակցություններ Կիևի և Մոսկվայի միջև, ինչպես արվել էր 2022 թվականին և վերջին անգամ՝ 2025 թվականի մայիսի 16-ին՝ Ստամբուլում։

Նշվում է, որ այցի ընթացքում անդրադարձ կլինի նաև Սիրիայում, Գազայում և Հարավային Կովկասում ստեղծված իրավիճակներին։

Կողմերը կքննարկեն Թուրքիայի և Ռուսաստանի միջև երկկողմ հարաբերությունների զարգացումը։ Քննարկման թեմաներից են լինելու առևտրային, էներգետիկ և զբոսաշրջային ոլորտներում համագործակցության ներկայիս վիճակը և դրա հնարավոր ընդլայնման ուղիները։

Ֆիդանն ու Լավրովը վերջին անգամ հանդիպել են 2025 թվականի ապրիլի 12-ին՝ Անթալիայի դիվանագիտական համաժողովի շրջանակում։