07.10.2026 | 12:47
Դատախազությունը պահանջում է ՊԵԿ նախկին պաշտոնյայից հօգուտ պետության բռնագանձել 3 անշարժ գույք, մեքենա և շուրջ 450 մլն դրամ
Ռուսաստանը և Ուկրաինան հայտարարել են երկու կողմերից 390 ռազմագերու փոխանակման մասին
Քաղաքականություն
23.05.2025 | 19:32
Ուկրաինական գերությունից Ռուսաստան է վերադարձվել 270 ռազմագերի և 120 քաղաքացիական անձ, հաղորդել է ՌԴ Պաշտպանության նախարարությունը, գրում է Meduza-ն։
Նշվում է, որ փոխանակումը տեղի է ունեցել կողմերի միջև Ստամբուլում ձեռք բերված պայմանավորվածությունների շրջանակում։ Առաջիկա օրերին նախատեսվում է շարունակել Ուկրաինայի հետ գերիների լայնածավալ փոխանակումը։ Այժմ գերությունից վերադարձված ռուս զինծառայողներն ու քաղաքացիական անձինք գտնվում են Բելառուսի տարածքում, որտեղ նրանց անհրաժեշտ հոգեբանական և բժշկական օգնություն է ցուցաբերվում։ Նրանք շուտով կտեղափոխվեն ՌԴ՝ բժշկական հաստատություններում բուժման և վերականգնողական բուժման համար։
Ուկրաինայի նախագահ Վլադիմիր Զելենսկին ևս հաստատել է գերիների փոխանակումը։ Նա հայտարարել է 390 ուկրաինացու վերադարձի մասին և դա ուղղակիորեն կապել Ստամբուլում ձեռք բերված համաձայնության հետ։ Նա գրում է, որ փոխանակումը կշարունակվի շաբաթ և կիրակի օրերին։
Հավելենք, որ ՌԲԿ Ուկրաինան, վկայակոչելով իր աղբյուրներին, հայտնել էր, որ «1000-ը 1000-ի դիմաց» ձևաչափով գերիների փոխանակումը կանցկացվի երեք օրվա ընթացքում։ Միաժամանակ, FT-ն, հղում անելով անանուն ուկրաինացի պաշտոնյաների, պնդում է, որ փոխանակում են հիմնականում զինվորականների, սակայն տուն կվերադառնան նաև քաղաքացիական անձինք։
Այսօր ավելի վաղ ԱՄՆ նախագահ Դոնալդ Թրամփը հայտնել էր Ռուսաստանի և Ուկրաինայի միջև գերիների խոշոր փոխանակման մասին։
Թարգմանությունը՝ Էմմա Չոբանյանի
