Ուկրաինական ԱԹՍ-ները գրոհել են Լիպեցկը․ հարված է հասցվել ԱԹՍ-ների մարտկոցներ արտադրող գործարանին․ ՏԵՍԱՆՅՈՒԹ  

Ուկրաինական ԱԹՍ-ները մայիսի լույս 23-ի գիշերը գրոհել են ՌԴ Լիպեցկի մարզը։ Ենթադրաբար, անօդաչու թռչող սարքերը հարվածել են Ելեց քաղաքում գտնվող «Էներգիա» գործարանին, որն անօդաչու թռչող սարքերի համար նախատեսված մարտկոցներ է արտադրում, գրում է Current time-ը։

Baza տելեգրամ ալիքի հաղորդմամբ՝ հարվածի հետևանքով գործարանում հրդեհ է բռնկվել, բոլոր աշխատողները տարհանվել են։ Տեղի բնակիչները պնդում են, որ տասից ավելի պայթյուններ են լսել։

Լիպեցկի նահանգապետ Իգոր Արտամոնովը հաստատել է Ելեցի վրա անօդաչու թռչող սարքի հարձակումը և հայտարարել, որ «անօդաչու թռչող սարքի  ընկնելու և Ելեցի արդյունաբերական գոտում բռնկված հրդեհի հետևանքով վիրավորվել է ութ մարդ»։

«Բեկորներն ընկել են արդյունաբերական գոտում՝ հրդեհ առաջացնելով։ Արտակարգ իրավիճակների ծառայություններն աշխատում են դեպքի վայրում, մարդիկ տարհանվում են»,- ասել է նահանգապետը՝ հավելելով, որ  հարձակումը շարունակվում է։

Նրա խոսքով՝ մեկ այլ անօդաչու թռչող սարքի մնացորդներն ընկել են բնակելի շենքի տանիքին։

«Բնակիչները արագ տարհանվել են, զոհեր չկան։ Շենքը չի ավերվել։ Դեպքի վայրում աշխատում են պայթուցիկ նյութերի վնասազերծման մասնագետները և արտակարգ ծառայությունները»,- ասել է նահանգապետը։

Տեղի բնակիչները սոցիալական ցանցերում գրում են «Էներգիա» գործարանին մի քանի հարվածների մասին։ Այն Ռուսաստանում կուտակիչների և մարտկոցների խոշորագույն արտադրողներից է, գործարանի կայքի համաձայն՝ ՌԴ ՊՆ մատակարարներից։

Ուկրաինական Supernova+ տելեգրամ ալիքը պայթյունների և հրդեհների մի քանի տեսանյութ է հրապարակել, որոնք, ենթադրաբար, նկարահանվել են Ելեցի բնակիչների կողմից։

Ռոսավիացիան էլ Մոսկվայի Դոմոդեդովո և Ժուկովսկի օդանավակայանները բացել է միայն առավոտյան ժամը 4-ին, իսկ առավոտյան ժամը 6-ին՝ Իվանովոյի, Կալուգայի, Կոստրոմայի, Տամբովի և Յարոսլավլի օդանավակայանները։

ՌԴ ՊՆ-ն, իր հերթին, հայտնում է, որ մայիսի 22-ի երեկոյան ժամը 8-ից Ռուսաստանի 12 շրջաններում և բռնակցված Ղրիմում խոցվել է ուկրաինական 112 անօդաչու թռչող սարք։ Նշվում է, որ 24 ԱԹՍ խոցվել է Մոսկվայի մարզում, 22-ը՝ Ղրիմում, 18-ը՝ Տուլայում, 11-ը՝ Կուրսկում։ Մյուսները խոցվել են Օրյոլի, Բրյանսկի, Ռյազանի, Կալուգայի, Բելգորոդի, Վլադիմիրի, Վորոնեժի և Լիպեցկի շրջաններում։

Թարգմանությունը՝ Էմմա Չոբանյանի