Եվրախորհրդարանը հավանություն է տվել ՌԴ-ից և Բելառուսից ներմուծվող գյուղատնտեսական ապրանքների մաքսատուրքերի բարձրացմանը

Եվրախորհրդարանն այսօր հաստատել է Ռուսաստանից և Բելառուսից ներմուծվող մի շարք գյուղատնտեսական ապրանքների մաքսատուրքերի 50 տոկոսով բարձրացումը, գրում է DW-ի ռուսական ծառայությունը։

Նշվում է, որ խոսքն այն ապրանքների մասին է, որոնք մինչ օրս չեն ենթարկվել ԵՄ որևէ մաքսատուրքի, այդ թվում՝ շաքարի, քացախի, ալյուրի և կենդանիների կերերի: Այսպիսով, նոր օրենքի ուժի մեջ մտնելուց հետո Ռուսաստանից բոլոր գյուղատնտեսական ներմուծումները կենթարկվեն ԵՄ մաքսատուրքերի։

Պատգամավորները նաև աջակցել են Ռուսաստանից և Բելառուսից ներմուծվող պարարտանյութերի համար 6,5 տոկոս մաքսատուրքի սահմանմանը՝ գումարած 2025-2026 թվականներին մեկ տոննայի համար 40-45 եվրո լրացուցիչ վճարների: Մինչև 2028 թվականն այս տուրքերը կբարձրանան՝ հասնելով մեկ տոննայի համար 430 եվրոյի։

Օրինագիծն ընդունվել է առաջին ընթերցմամբ։ Կողմ է քվեարկել 411 պատգամավոր, դեմ՝ 100, ձեռնպահ՝ 78-ը։

Այսպիսով, Եվրախորհրդարանն ընդունել է Եվրահանձնաժողովի կողմից հունվարի վերջին արված առաջարկը։ Այժմ ԵՄ Խորհուրդը պետք է հաստատի այն։

Եվրահանձնաժողովը նշում է, որ այս նորարարությունը չի ազդում ռուսական գյուղատնտեսական արտադրանքի և պարարտանյութերի՝ երրորդ երկրներ արտահանման վրա, ինչը համապատասխանում է ԵՄ-ի կողմից ամբողջ աշխարհում պարենային անվտանգությունն ապահովելու պարտավորությանը։ Սա նշանակում է, որ ռուսական գյուղատնտեսական արտադրանքի գնման և վաճառքի գործողությունները մնում են անփոփոխ, ինչպես նաև դրանց պահպանումը Եվրամիության մաքսային պահեստներում, նավերով տեղափոխումը, ապահովագրական և ֆինանսավորման ծառայությունների մատուցումը։

Ռուսաստանի և Բելառուսի կողմից պարարտանյութերից ստացված եկամուտը Բրյուսելում համարվում է Ուկրաինայի դեմ պատերազմին ուղղակի ներդրում։

«Ռուսաստանից և Բելառուսից ներմուծվող ապրանքների մաքսատուրքերն աստիճանաբար բարձրացնելու որոշումը կօգնի կանխել Ռուսաստանի կողմից ԵՄ շուկան իր ռազմական մեքենան ֆինանսավորելու համար օգտագործելը»,- ավելի վաղ նշել էր Եվրախորհրդարանի Ռուսաստանի հարցերով մշտական ​​զեկուցող Ինեզե Վայդերեն։

Նա անընդունելի է համարում, որ Ռուսաստանի կողմից Ուկրաինայի դեմ լայնածավալ պատերազմի սկսվելուց ավելի քան երեք տարի անց Եվրամիությունը դեռևս մեծ քանակությամբ կարևորագույն ապրանքներ է գնում այդ երկրից։ Ռուսաստանից ԵՄ պարարտանյութերի ներմուծման ծավալը, որն արդեն բարձր էր 2023 թվականին, զգալիորեն աճել է 2024 թվականին։ Եվրահանձնաժողովն այս իրավիճակը որակում է որպես տնտեսական կախվածություն Ռուսաստանից և կարծում է, որ պատշաճ միջամտության բացակայության դեպքում այն ​​կարող է վնասել ԵՄ-ի պարենային անվտանգությանը:

ԵՄ-ն ձգտում է նվազեցնել իր կախվածությունը Ռուսաստանից և Բելառուսից մատակարարումներից և ակնկալում է, որ նոր միջոցառումները զգալիորեն կնվազեցնեն վերոնշյալ ապրանքների ԵՄ ներմուծման ծավալը: Դա պետք է բերի ԵՄ-ում պարարտանյութերի արտադրության հետագա դիվերսիֆիկացման։

Օրենքը նաև թույլ կտա ԵՄ-ին ավելացնել պարարտանյութերի սեփական արտադրությունը, որը տուժել է ռուսական էժան ներմուծումից, և գյուղացիներին ժամանակ կտա հարմարվելու համար։ Եվրախորհրդարանը Եվրահանձնաժողովին հանձնարարել է վերահսկել և միջոցներ ձեռնարկել գների բարձրացումը մեղմելու համար, որը կարող է վնասել ներքին շուկային և ԵՄ գյուղատնտեսությանը։

Թարգմանությունը՝ Էմմա Չոբանյանի