ՌԴ ԱԳՆ-ն հայտարարել է, թե Ուկրաինայի ժողովուրդը պետք է նոր ղեկավարություն ընտրի՝ Մոսկվայի հետ հուշագիր ստորագրելու համար

Ուկրաինայի ժողովուրդը պետք է նոր ղեկավարություն ընտրի՝ Ռուսաստանի Դաշնության հետ հուշագիրը ստորագրելու համար, խորհրդարանի ղեկավարը կարող է իրավաբանորեն չհամապատասխանել ստորագրողի դերին։ ՏԱՍՍ-ի հետ զրույցում այս մասին հայտարարել է Ռուսաստանի ԱԳՆ իրավաբանական վարչության ղեկավար Մաքսիմ Մուսիխինը՝ մեկնաբանելով հնարավոր փաստաթղթի կնքման հետ կապված իրավիճակը։

«Կարևորն այն է, թե ում ստորագրությունն է փաստաթղթերում, քանի որ նրանց ներկայիս առաջնորդը վաղուց կորցրել է նույնիսկ ներքին լեգիտիմությունը, ոչ միայն արտաքին։ Համապատասխանաբար, կարող են խնդիրներ առաջանալ նման անձի կողմից ստորագրված ցանկացած համաձայնագրի վավերականության հետ կապված»,- ասել է նա։

Ռուս դիվանագետի խոսքով՝ պետք է բացարձակապես վստահ լինել, որ կարգավորման վերաբերյալ համաձայնագիրը ուկրաինական կողմից ստորագրվում է «այն անձի կողմից, ով ունի դա անելու ժողովրդի մանդատը», «հակառակ դեպքում՝ խնդիրներ կլինեն»։

Նա նաև նշել է, թե Ուկրաինայի նախագահ Վլադիմիր Զելենսկին հարմար չէ ստորագրողի դերի համար։ Մուսիխինը նաև ասել է, թե հուշագիրը քննարկվել է ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև զրույցի ժամանակ, «անհրաժեշտ է այն ճիշտ ստորագրող», բայց «դա հիմա խնդիր է»։

Հիշեցնենք, որ մայիսի 19-ին Թրամփի հետ երկժամյա զրույցից հետո լրագրողների հետ զրույցում ՌԴ նախագահ Վլադիմիր Պուտինը հայտարարել էր, որ Մոսկվան «պատրաստ է ուկրաինական կողմի հետ համագործակցել մի շարք դիրքորոշումներ սահմանող հնարավոր խաղաղության պայմանագրի վերաբերյալ հուշագրի շուրջ»։ Ըստ նրա՝ այդ դիրքորոշումների թվում են կարգավորման սկզբունքները և խաղաղության համաձայնագրի հնարավոր կնքման ժամկետները, այդ թվում՝ «որոշակի ժամանակահատվածով հնարավոր հրադադարը, եթե ձեռք բերվեն համապատասխան պայմանավորվածություններ»։

ԱՄՆ պետքարտուղար Մարկո  Ռուբիոն էլ ասել է, որ Ռուսաստանը խոստացել է Միացյալ Նահանգներին ուղարկել «այն պայմանները, որոնք անհրաժեշտ են Ուկրաինայի հետ հրադադարի հասնելու համար»։

Թարգմանությունը՝ Էմմա Չոբանյանի