18.02.2026 | 11:22
Ուկրաինացիները երբեք չեն ների Դոնբասի փոխանցումը Ռուսաստանին. Զելենսկի
ՌԴ-Ուկրաինա հաջորդ բանակցությունները կարող են տեղի ունենալ հունիսի կեսերին Վատիկանում
Քաղաքականություն
22.05.2025 | 12:24
Ֆինլանդիայի նախագահ Ալեքսանդր Ստուբը հայտարարել է, որ Ուկրաինայի և Ռուսաստանի ներկայացուցիչների միջև պատերազմի ավարտի վերաբերյալ «տեխնիկական» բանակցությունները կարող են շարունակվել Վատիկանում մի քանի օրից։ Միաժամանակ, ֆինն քաղաքական գործիչը հայտարարել է, որ ԱՄՆ-ը դուրս չի գալիս բանակցային գործընթացից, փոխանցում է DW-ի ռուսական ծառայությունը։
«Նրանք չեն հանձնվել։ Իսկ հիմա միջնորդներն ավելի շատ են։ Նախկինում այս դերը կատարում էր միայն ԱՄՆ-ը, բայց հիմա Եվրոպան նույնպես միանում է»,- Ստուբի խոսքերն է մեջբերում Yle-ն։
Ֆինլանդիայի նախագահը սա «լավ զարգացում» է անվանել։ Նրա խոսքով՝ ԱՄՆ նախագահ Դոնալդ Թրամփի և նրա ուկրաինացի ու ռուս գործընկերներ Վլադիմիր Զելենսկիի և Վլադիմիր Պուտինի միջև մայիսի 19-ին կայացած զրույցից հետո քննարկումները շարունակվել են «տարբեր մակարդակներում»։
The Wall Street Journal-ը նույնպես, հղում անելով սեփական աղբյուրներին, հաղորդում է, որ ԱՄՆ նախագահ Դոնալդ Թրամփը մայիսի 19-ին եվրոպացի առաջնորդների հետ զրույցի ժամանակ հայտարարել է, որ Ռուսաստանի և Ուկրաինայի պատվիրակությունների միջև հաջորդ բանակցությունները տեղի կունենան Վատիկանում։ Վաշինգտոնը բանակցություններում կներկայացնեն ԱՄՆ պետքարտուղար Մարկո Ռուբիոն և Ուկրաինայի հարցով նախագահի հատուկ բանագնաց Քիթ Քելլոգը։
WSJ-ը գրում է, որ Վատիկանում բանակցությունները, ինչպես սպասվում է, տեղի կունենան հունիսի կեսերին։
Հռոմի պապ Լևոն XIV-ը հայտարարել է, որ պատրաստ է Վատիկանում ընդունել Ռուսաստանի և Ուկրաինայի միջև բանակցությունների հաջորդ փուլը:
Հիշեցնենք, որ մայիսի 16-ին Ստամբուլում տեղի էին ունեցել Ուկրաինայի և Ռուսաստանի ներկայացուցիչների միջև 2022 թվականից ի վեր առաջին ուղիղ բանակցությունները։ Կողմերը համաձայնության էին եկել գերիների փոխանակման հարցում՝ «1000-ը 1000-ի դիմաց» ձևաչափով և հստակեցրել, որ կա բանակցությունները շարունակելու հեռանկար։ Քննարկվել էր Պուտինի և Զելենսկիի անձնական հանդիպման հնարավորությունը։ Բացի այդ, տեղեկություններ էին տարածվել, որ Ռուսաստանի ներկայացուցիչները Ստամբուլում կայացած հանդիպմանն առաջ են քաշել «անիրատեսական» պայմաններ, սպառնացել գրավել Խարկովի և Սումիի մարզերը։
Թարգմանությունը՝ Էմմա Չոբանյանի
