07.03.2026 | 19:37
Ինչ իրավիճակ է ճանապարհներին
Կոնյակը մնացել է Լարսում․ ինչ են ստուգում վրացի մաքսավորները. ՏԵՍԱՆՅՈՒԹ
Տնտեսություն
21.05.2025 | 19:32
«Արդարությո՛ւն» վանկարկումով և «Հանուն հայ-վրացական բարեկամության», «Մի՛ խաթարեք հայ-վրացական բարեկամությունը» գրություններով պաստառներով կոնյակագործներն այսօր ՀՀ-ում Վրաստանի դեսպանատան մոտ կրկին բողոքի ակցիա էին իրականացնում։
Ըստ նրանց՝ Ռուսաստան և Բալթյան երկրներ արտահանման համար նախատեսված կոնյակը Վերին Լարսի անցակետում չնախատեսված լաբորատոր փորձաքննությունների է ենթարկվում, ինչն ուշացումների և ֆինանսական կորուստների պատճառ է դառնում։
Գործարանների աշխատակիցները մեկ շաբաթ առաջ կրկին այստեղ էին։ Դեսպանատնից խոստացել էին, որ Թբիլիսին պաշտոնական հայտարարություն կանի, թե ինչու է հայ արտահանողների արտադրանքը շաբաթներով վրացական սահմանին մնում լաբորատոր ստուգումների պատճառաբանությամբ։
Վրացական կողմը հայտարարություն չտարածեց․ հարկադիր պարապուրդում հայտնված աշխատակիցներն այսօր իրենց հարցերի պատասխաններն այդպես էլ չստացան։ Բողոքի ակցիայի՝ դեսպանատուն հանդիպման մտած մասնակիցներից երկուսը դուրս եկան ու հավաքվածներին փոխանցեցին՝ խնդրի լուծման տարբերակներ չեն հնչել։
«Կոնսուլն ասել է՝ դիմեք Վրաստանի դատարան»,- նշում է հանդիպման մասնակիցներից մեկը։
Ակցիայի մասնակիցները նախ երկկողմանի փակեցին Ծարավ Աղբյուրի փողոցը, ապա հայտարարեցին՝ երթով շարժվում են Կառավարության շենք։ Այդ ընթացքում դեսպանատնից փոխանցել են, թե պաշտոնական Թբիլիսին խոստացել է մի քանի օրվա ընթացքում լուծել խնդիրը։
Նախորդ բողոքի ակցիայից հետո էլ էկոնոմիկայի նախարար Գևորգ Պապոյանը հայտարարել էր, որ հայ կոնյակագործների բողոքն արդարացի է և ինքն անձամբ մեկնելու է Վրաստան՝ այս հարցին լուծում տալու համար։ Այսօր նախարարությունից Factor TV-ին հայտնեցին, որ հարցի կարգավորման ուղղությամբ ամենօրյա ինտենսիվ աշխատանքներ են տարվում։ Կառույցից վերահաստատում են՝ անհրաժեշտության դեպքում նախարարը Վրաստան կայցելի։
Մանրամասները՝ տեսանյութում։
Անի Թամրազյան
