Քաղաքականություն
21.05.2025 | 11:51
Այսօր առավոտյան Թեհրանում ի կատար է ածվել մահապատժի դատավճիռը Յասին Հուսեյնզադեի նկատմամբ, որը հարձակում էր իրականացրել Իրանում Ադրբեջանի դեսպանատան վրա։ Այս մասին հայտնել է Իրանի դատական համակարգը, որին վկայակոչում են ադրբեջանական լրատվամիջոցները։
Հիշեցնենք, որ 2023 թվականի հունվարի 27-ին զինված հարձակում էր իրականացվել Իրանի Ադրբեջանի դեսպանատան վրա։ Ինքնաձիգով զինված հարձակվողը ճեղքել էր անվտանգության կետը և սպանել անվտանգության ծառայության պետ Օրհան Ասկերովին։ Հարձակումը կանխելիս վիրավորվել էին դեսպանատան անվտանգության երկու աշխատակից՝ Վասիֆ Տագիևը և Մահիր Իմանովը։
Հաղորդվել էր, որ հարձակվողը մտել է դեսպանատուն իր երկու անչափահաս երեխաների հետ՝ հավելելով, որ «նախնական քննությունը ցույց է տալիս, որ հարձակվողի շարժառիթն անձնական և ընտանեկան խնդիրներն են»։ Հարձակվողը պատմել էր, թե որևէ պատասխան չի ստացել դեսպանատնից իր բազմաթիվ այցերի ժամանակ և մտածել է, որ իր կինը թաքնվում է այնտեղ և չի ցանկանում հանդիպել իրեն։
Պաշտոնական Բաքուն հարձակումը որակել էր «ահաբեկչություն»։ Միջադեպից հետո Բաքուն տարհանել էր Թեհրանում Ադրբեջանի դեսպանատան աշխատակիցներին,և դադարեցրել գործունեությունը։ Այս միջադեպը լարվածություն էր առաջացրել երկու երկրների հարաբերություններում։
Բաքվի և Թեհրանի բանակցությունների արդյունքում Իրանում Ադրբեջանի դեսպանությունը գործունեությունը վերսկսել է նոր հասցեում՝ 2024 թվականի հուլիսի 15-ին:
Թարգմանությունը՝ Էմմա Չոբանյանի
