20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Թրամփը հայտարարել է՝ Ռուսաստանն ու Ուկրաինան անմիջապես կսկսեն հրադադարի շուրջ բանակցությունները
Քաղաքականություն
19.05.2025 | 22:11
ԱՄՆ նախկին նախագահ Դոնալդ Թրամփը նշել է, որ համաձայնության է եկել Վլադիմիր Պուտինի հետ՝ Ուկրաինայի հետ հրադադարի շուրջ բանակցություններ սկսելու վերաբերյալ։ Այդ մասին նա գրել է Truth Social հարթակում։
«Այդ բանակցությունների պայմանները կքննարկվեն երկու կողմերի միջև, ինչպես որ պետք է լինի, որովհետև հենց նրանք են մանրամասներին տիրապետող կողմերը», — գրել է նա։
Թրամփը հայտնել է, որ արդեն տեղեկացրել է բանակցության արդյունքների մասին Ուկրաինայի նախագահ Վոլոդիմիր Զելենսկուն, Եվրոպական հանձնաժողովի նախագահ Ուրսուլա ֆոն դեր Լայենին, ինչպես նաև Ֆրանսիայի և Ֆինլանդիայի նախագահներին, Իտալիայի վարչապետին և Գերմանիայի կանցլերին։
Բացի դրանից՝ Թրամփը նշել է, որ զրույցը անցել է լավ։
«Ռուսաստանը ցանկանում է լայնածավալ առևտուր վարել ԱՄՆ-ի հետ, երբ ավարտվի այս կործանարար «արյունալի մսաղացը», և ես դրան աջակցում եմ։ Ռուսաստանը հսկայական հնարավորություններ ունի հսկայական թվով աշխատատեղեր և հարստություն ստեղծելու համար։ Նրա ներուժը սահմանաչափ րունի։ Նույն կերպ՝ Ուկրաինան կարող է դառնալ առևտրի մեծ շահառու՝ իր երկրի վերականգնման գործընթացում»,- գրել է Թրամփը։
Պուտինի հետ զրույցից առաջ Թրամփը զանգահարել է Զելենսկուն։ «The Wall Street Journal»-ը, հղում տալով ամերիկացի պաշտոնյայի և բանակցությունների ընթացքին ծանոթ մեկ այլ անձի, գրում է, որ ամերիկացի առաջնորդը հարցրել է Ուկրաինայի նախագահին, թե ինչ է պետք ասել Պուտինին։ Զելենսկին պատասխանել է, որ Թրամփը պետք է համոզի Պուտինին 30-օրյա հրադադարի համաձայնության գալ, պայմանավորվի Պուտինի և Զելենսկու անձնական հանդիպման մասին, որին ինքն էլ կարող է մասնակցել, ինչպես նաև հաստատի, որ Վաշինգտոնը Ուկրաինայի վերաբերյալ որևէ որոշում չի ընդունի առանց Կիևի մասնակցության։
Ավելի վաղ Պուտինը Թրամփի հետ զրույցն անվանել էր անկեղծ և բովանդակալից։
