Հնդկաստանում Թուրքիայի հայտնի ապրանքանիշերի դեմ բոյկոտ է սկսվել

Հնդկաստանի և Պակիստանի միջև աճող լարվածության ֆոնին Իսլամաբադին Թուրքիայի բացահայտ աջակցությունը արձագանք է առաջացրել Նյու Դելիի վարչակազմի և հանրության կողմից։ Միաժամանակ, Հնդկաստանում թուրքական ծագում ունեցող ապրանքների և ծառայությունների համապարփակ բոյկոտ է սկսվել։ Երկրի առաջատար առցանց առևտրի հարթակները վաճառքից հանել են թուրքական ծագում ունեցող բազմաթիվ ապրանքանիշեր, գրում է թուրքական Sozcu-ն։

Լրատվամիջոցը գրում է, որ Հնդկաստանում գործող խոշոր առևտրային հարթակները որոշել են դադարեցնել Թուրքիայից ներմուծված ապրանքների վաճառքը։

Բոյկոտի շրջանակում հատկապես ուշադրության է արժանանում տեքստիլ արտադրանքը։ Հարթակներում կատարված դիտարկումները ցույց են տվել, որ այնպիսի ապրանքանիշերի ապրանքները, ինչպիսիք են Trendyol-ի, LC Waikiki-ի, Koton-ի և Mavi-ի հագուստեղենը, այժմ ցուցադրվում են «Պահեստում չկա» գրությամբ։

Հաղորդվում է, որ բոյկոտը վերաբերում է նաև գյուղմթերքին։ Հնդկաստանի Փրայագրաջ քաղաքի որոշ խանութներ նույնպես արձագանքել են բոյկոտին։

«Մենք միշտ աջակցել ենք Թուրքիային, բայց նրանք դավաճանել են մեզ»,- ասել է մրգավաճառներից մեկը, որը հրաժարվում է թուրքական խնձոր վաճառել։

Հիշեցնենք, որ ավելի վաղ էլ տեղեկություններ էին տարածվել, որ հնդիկները չեղարկում են Թուրքիայի և Ադրբեջանի հայտնի հանգստավայրերում ծրագրած արձակուրդները, քանի որ այս երկրներն աջակցել են Պակիստանին Նյու Դելիի հետ վերջին հակամարտության ժամանակ:

Թարգմանությունը՝ Էմմա Չոբանյանի